У рамках конкурсу прафесійнага майстэрства «Педагог-інаватар Купалаўскага ўніверсітэта 2026» удзельнікам прапануюцца 3 конкурсныя выпрабаванні: «Педагагічная майстэрня», «Інавацыйнае рашэнне» і «Дыялог педагога».
Выпрабаванне першага этапа - "Педагагічная майстэрня" - ператварылася ў прастору, дзе тэорыя сустрэлася з практыкай, а сумесны дыялог пашырыў пачатковыя межы майстар-класа. Старшы выкладчык кафедры прыродазнаўчых і лінгвістычных дысцыплін і методык іх выкладання Святлана Грынько падрабязна расказала, як ператварыць музей з месца пасіўнага прагляду ў працоўны інструмент педагога.
У ходзе майстар-класа былі закрануты ключавыя напрамкі музейна-педагагічнай дзейнасці, разгледжаны пакрокавыя алгарытмы вучэбнай актыўнасці выкладчыкаў і студэнтаў, а таксама абазначаны прынцыпы стварэння віртуальных музеяў – напрамак, які сёння перастае быць экзотыкай і інтэгруецца ў лічбавае адукацыйнае асяроддзе. Асобны блок склалі рэальныя студэнцкія праекты: як сфармуляваць вучэбную задачу, размеркаваць ролі, падабраць лічбавыя і матэрыяльныя рэсурсы і ператварыць заданне ў паўнацэнную музейную экспазіцыю.
Майстар-клас выйшаў за рамкі маналогу, удзельнікі актыўна задавалі пытанні. У прыватнасці, цікавіліся, як забяспечыць інтэграцыю музейных экспазіцый у кантэкст асабістага жыцця студэнта, каб яны не заставаліся толькі фонам, а таксама якім метадычным аспектам музейна-педагагічнай работы трэба ўдзяліць прыярытэтную ўвагу пры рабоце са студэнтамі. Адказы будаваліся не на агульных фармулёўках, а на канкрэтных прыкладах, педагагічных назіраннях.
Сачыць за ходам конкурсу і знаёміцца з матэрыяламі канкурсантаў можна на сайце электроннага навукова-метадычнага часопіса "Універсітэт адукацыйных інавацый".
23 красавіка адбудзецца майстар-клас дацэнта кафедры журналістыкі Анастасіі Зязюлевіч, якая падзеліцца вопытам пераадолення моўнага бар'ера ў полікультурнай аўдыторыі студэнтаў.
Гродзенскі дзяржаўны ўніверсітэт імя Янкі Купалы