9 красавіка педагагічны факультэт Гродзенскага дзяржаўнага ўніверсітэта імя Янкі Купалы стаў цэнтрам ажыўленай дыскусіі. Тут прайшла XXIII Міжнародная навуковая канферэнцыя студэнтаў, магістрантаў, аспірантаў «Эўрыка – 2026». Яе ўдзельнікамі сталі больш за 200 маладых даследчыкаў з Беларусі, Расіі, Кітая і Туркменістана.
Работа канферэнцыі праводзілася па сямі секцыях: «Дзяцінства ў аспекце педагагічных і псіхалагічных даследаванняў», «Актуальныя праблемы педагогікі і сацыяльнай працы», «Пытанні арганізацыі карэкцыйна-педагагічнай працы з дзецьмі, якія маюць асаблівасці псіхафізічнага развіцця», «Актуальныя праблемы выкладання мовы і літаратурнага чытання ва ўстановах адукацыі», «Навучанне матэматыцы і прыродазнаўчым дысцыплінам ва ўстановах адукацыі», «Менеджмент у адукацыі» і «Актуальныя пытанні сучасных сацыягуманітарных ведаў».
У сваіх навуковых дакладах удзельнікі разгледзелі шырокі спектр актуальных пытанняў. Сярод іх – сродкі павышэння лічбавай кампетэнтнасці педагогаў, алгарытмы планавання нестандартных урокаў, прымяненне кейс-метаду ў навучанні малодшых школьнікаў, а таксама стратэгіі развіцця пазнавальнай цікавасці ў вучняў пачатковых класаў. Акрамя таго, канферэнцыя закранула сучасныя падыходы да навучання, у тым ліку развіццё ідэй аб экзістэнцыйных станах асобы ў старажытнакітайскай філасофіі і іх значэнне ў нашы дні. Даклады былі прадстаўлены ў вочным і анлайн-фарматах на рускай, беларускай і англійскай мовах.
XXIII Міжнародная навуковая канферэнцыя студэнтаў, магістрантаў, аспірантаў «Эўрыка – 2026» прайшла ў фармаце жывога дыялогу. Удзельнікі з розных краін актыўна дзяліліся адзін з адным вынікамі сваіх даследаванняў, абменьваліся досведам і меркаваннямі, а таксама ўстанаўлівалі навуковыя кантакты.
Гродзенскі дзяржаўны ўніверсітэт імя Янкі Купалы