Сёння, 26 сакавіка, на базе юрыдычнага факультэта Гродзенскага дзяржаўнага ўніверсітэта імя Янкі Купалы пачала работу Міжнародная навуковая канферэнцыя студэнтаў, магістрантаў і аспірантаў "Правы чалавека і іх рэалізацыя ў міжнародным гуманітарным праве". Мерапрыемства праходзіць ужо другі раз. У гэтым годзе для абмеркавання актуальных пытанняў у сферы правоў чалавека сабраліся прадстаўнікі Беларусі, Расіі і Таджыкістана.
Удзельнікамі канферэнцыі сталі студэнты і аспіранты Гродзенскага дзяржаўнага ўніверсітэта імя Янкі Купалы, Варонежскага дзяржаўнага ўніверсітэта, Расійскай акадэміі народнай гаспадаркі і дзяржаўнай службы пры Прэзідэнце Расійскай Федэрацыі, Омскага дзяржаўнага ўніверсітэта імя Ф.М. Дастаеўскага, Паўднёва-Заходняга дзяржаўнага ўніверсітэта і Ташкенцкага дзяржаўнага юрыдычнага ўніверсітэта.
З урачыстым прывітаннем да ўдзельнікаў і гасцей форуму звярнулася кіраўніцтва юрыдычнага факультэта. Намеснік дэкана юрыдычнага факультэта, кандыдат юрыдычных навук, дацэнт Авак Вартанян прывітаў гасцей і падкрэсліў важнасць і актуальнасць тэмы канферэнцыі.
– Сёння ў нас ёсць магчымасць абмяняцца ведамі, меркаваннямі, ідэямі і вопытам, абмеркаваць сучасныя праблемы і перспектывы развіцця правоў чалавека ў кантэксце міжнароднага гуманітарнага права. Вашы даследаванні і навуковыя дыскусіі дапамогуць не толькі паглыбіць разуменне складаных прававых пытанняў, але і зрабіць унёсак у фармаванне больш справядлівага і гуманнага права, – адзначыў Авак Міхайлавіч.
У канцы ён пажадаў удзельнікам паспяховай, плённай працы і новых навуковых адкрыццяў.
Таксама з прывітальным словам да прысутных звярнулася загадчык кафедры міжнароднага права, кандыдат юрыдычных навук, дацэнт Лілія Абрамчык.
У рамках канферэнцыі маладыя вучоныя прадставяць даклады, абмяняюцца вопытам і абмяркуюць найбольш актуальныя пытанні рэалізацыі норм у міжнародным гуманітарным праве.
Гродзенскі дзяржаўны ўніверсітэт імя Янкі Купалы