Сёння, 25 лютага, у Купалаўскім універсітэце адбылося ўрачыстае адкрыццё выставы прац замежных студэнтаў кафедры выяўленчага мастацтва пад назвай «Полымя натхнення і таленту».
Адкрыла мерапрыемства рэктар Гродзенскага дзяржаўнага ўніверсітэта імя Янкі Купалы Ірына Кітурка. У сваёй прамове Ірына Фёдараўна яшчэ раз павіншавала студэнтаў з Кітайскай Народнай Рэспублікі з Новым годам, які праходзіць з 17 лютага па 3 сакавіка. Рэктар Ірына Кітурка высока ацаніла прадстаўленыя работы, адзначыўшы адлюстраванне ў іх культурных традыцый, якія садзейнічаюць умацаванню міжкультурнага дыялога ва ўніверсітэце.
– Я ўпэўнена, што прафесіяналізм нашых выкладчыкаў і цеплыня сэрцаў нашых супрацоўнікаў дазволіць вам павезці кавалачак Беларусі на сваю Радзіму! – падкрэсліла Ірына Фёдараўна.
Выстава прадстаўляе працы студэнтаў з розных краін, дэманструючы іх майстэрства і культурную разнастайнасць. Экспазіцыя ўключае творы, выкананыя ў розных тэхніках і стылях. Наведвальнікі могуць азнаёміцца з акрылавым жывапісам, узорамі дэкаратыўна-прыкладнога мастацтва, аўтарскімі лялькамі, выцінанкай, а таксама з пейзажамі, нацюрмортамі і сюжэтнымі кампазіцыямі.
Выставу, якая размяшчаецца ў холе 2 паверха галоўнага корпуса ўніверсітэта па адрасе: вул. Ажэшкі, 22, можа наведаць кожны жадаючы.
Гродзенскі дзяржаўны ўніверсітэт імя Янкі Купалы