Гродзенскі дзяржаўны ўніверсітэт імя Янкі Купалы з новага навучальнага года адкрывае набор на новую спецыяльнасць – 6-05-0714-03 «Інжынерна-тэхнічнае праектаванне і вытворчасць матэрыялаў і вырабаў з іх» на інжынерным факультэце.
Унікальнасць спецыяльнасці заключаецца ў яе ўніверсальнасці і запатрабаванасці. Загадчык кафедры матэрыялазнаўства і рэсурсазберагальных тэхналогій, кандыдат тэхнічных навук Аляксандр Скаскевіч адзначыў, што новая спецыяльнасць арыентавана на рэальную вытворчасць.
– Сёння маладыя інжынеры павінны мець кампетэнцыі ў галіне кампазіцыйных матэрыялаў, у галіне канструявання вырабаў на аснове кампазіцыйных матэрыялаў і падрыхтоўкі вытворчасці ў выглядзе адпаведных тэхналагічных працэсаў, – падкрэсліў Аляксандр Аляксандравіч.
У рамках спецыяльнасці студэнты не толькі вывучаць матэрыялазнаўства, але і навучацца мадэляваць канструкцыі вырабаў і тэхналагічныя аснасткі, складаць кіруючыя праграмы для абсталявання з ЧПУ, а таксама асвояць сучасныя лічбавыя і інфармацыйныя тэхналогіі, без якіх сёння інжынерная дзейнасць неэфектыўная.
Асаблівы акцэнт у навучанні будзе зроблены на практыку. У праграму ўключаны навучальная і вытворчая практыка, накіраваныя на засваенне працоўных прафесій. Дыпломныя праекты студэнты будуць выконваць на аснове заявак арганізацый-заказчыкаў кадраў.
Пасля заканчэння навучання выпускнікі змогуць праектаваць тэхналагічныя працэсы вырабу дэталей і вырабаў, распрацоўваць і аптымізаваць вытворчыя працэсы, а таксама ўкараняць лічбавыя тэхналогіі ў інжынерную дзейнасць. Яны змогуць працаваць у сферы машынабудавання, хімічнай прамысловасці, аўтамабілебудавання, інжынірынгавых арганізацыях, якія абслугоўваюць прамысловае абсталяванне, а таксама аддзелах падрыхтоўкі і праектавання вытворчасці.
Для студэнтаў, якія жадаюць не толькі атрымліваць веды, але і адразу прымяняць іх на практыцы, будзе магчымасць сумяшчаць навучанне і вытворчую дзейнасць.
Каб паступіць на спецыяльнасць «Інжынерна-тэхнічнае праектаванне і вытворчасць матэрыялаў і вырабаў з іх», неабходна будзе здаць беларускую або рускую мову (ЦЭ або ЦТ), матэматыку (ЦЭ або ЦТ), фізіку (ЦЭ або ЦТ). Для выпускнікоў школ з залатым медалём і навучэнцаў каледжаў з дыпломам з адзнакай будзе магчымасць паступіць на бюджэтную форму навучання без уступных іспытаў. Навучанне па дадзенай спецыяльнасці складзе 4 гады, у канцы навучання выпускнікі атрымаюць кваліфікацыю «Інжынер».
Усяго ў 2026 годзе на дадзеную адукацыйную праграму плануюць набраць адну акадэмічную групу ў складзе 25 чалавек.
Гродзенскі дзяржаўны ўніверсітэт імя Янкі Купалы