10 лютага Міністр адукацыі Беларусі Андрэй Іванец правёў калегію, на якой падвёў вынікі работы ведамства за 2025 год і абазначыў ключавыя задачы на 2026 год.
Удзельнікамі пасяджэння падагульняючай калегіі сталі намеснік прэм'ер-міністра Наталля Пяткевіч, першы намеснік кіраўніка Адміністрацыі Прэзідэнта Уладзімір Перцоў, старшыні профільных камісій Нацыянальнага сходу, а таксама кіраўнікі рэспубліканскіх органаў дзяржаўнага кіравання і ўстаноў адукацыі з усёй Беларусі.
На парадку дня было выступленне кіраўнікоў рэгіёнаў і педагогаў, абмеркаванне стратэгічных напрамкаў развіцця адукацыі і ўзнагароджанне найлепшых устаноў і калектываў галіны.
Падводзячы вынікі мінулага года, Андрэй Іванец адзначыў, што ў 2025 годзе ў сістэме адукацыі прайшоў шэраг падзей з прыстаўкай «упершыню»:
– Праца з адоранымі школьнікамі выйшла на новы ўзровень, і вочна-дыстанцыйная алімпіяда, якая праводзіцца ў круглагодным фармаце, сёлета ўпершыню прайшла ў фармаце настаўнік-вучань. Гэта вельмі важна, калі мы падключаем настаўніка да таго, каб ён таксама рос над сабой і мог даць рабятам веды высокага ўзроўню. На ўзроўні прафесійна-тэхнічнай адукацыі па даручэнні Кіраўніка дзяржавы мы ўпершыню пачалі ствараць навучальныя майстэрні на прадпрыемствах. Ужо функцыянуюць 65 такіх майстэрняў, і гэта толькі пачатак працы.
Акрамя таго, у 2025 годзе было створана 16 студэнцкіх канструктарскіх бюро на базе 13 вышэйшых навучальных устаноў. Яшчэ 5 плануецца стварыць у 2026 годзе. Таксама ў мінулым годзе прайшла першая Нацыянальная школа рэктараў, якая стала пляцоўкай для дыялогу і «зверкі гадзіннікаў» для ВНУ, прадстаўнікоў органаў улады, міністэрстваў і бізнесу. Такія мерапрыемствы плануюць зрабіць штогадовымі.
Па выніках работы галіны адукацыі ў 2025 годзе Галоўнае ўпраўленне адукацыі Гродзенскага аблвыканкама стала лепшым у краіне.
Гаворачы пра задачы на 2026 год, Андрэй Іванец вылучыў тры ключавыя вектары развіцця: даступнасць дашкольнай адукацыі для дзяцей да 2 гадоў, забеспячэнне якасці адукацыі і развіццё навуковых школ і навукі ў вышэйшых навучальных установах. Таксама Міністр адукацыі адзначыў, што важная задача на бліжэйшую пяцігодку – развіццё траекторыі паступлення ў каледжы: трэба, каб яна стала настолькі ж прыярытэтнай, як і працяг навучання ў старэйшых класах школы.
Пасяджэнне калегіі Міністэрства адукацыі Рэспублікі Беларусь стала важнай падзеяй для вызначэння вектара далейшага развіцця адукацыі ў краіне.
Гродзенскі дзяржаўны ўніверсітэт імя Янкі Купалы