У рамках падрыхтоўкі да абнаўлення візуальнага афармлення новых транспартных карт восенню 2025 года ААТ «Аўтобусны парк г. Гродна» праводзіў адбор дызайн-канцэпцый асабовага боку праязнога дакумента. Аўтарам лепшага дызайну стаў навучэнец Гуманітарнага каледжа Гродзенскага дзяржаўнага ўніверсітэта імя Янкі Купалы Руслан Бубновіч.
Руслану Бубновічу 17 гадоў, ён ужо некалькі гадоў прафесійна займаецца графічным дызайнам, сумяшчаючы працу ў Мінску з навучаннем у Гуманітарным каледжы УА «ГрДУ імя Янкі Купалы».
Па словах маладога чалавека, аб конкурсе на дызайн транспартнай карты ён даведаўся за два дні да яго заканчэння, але не разгубіўся і ўзяўся за працу. Распрацоўваючы дызайн, ён абапіраўся на досвед укаранення сістэмы карт у іншых гарадах і спрабаваў пераасэнсаваць звыклы папяровы праязны.
– У якасці славутасці абраў драмтэатр, таму што ён добра ўпісваецца ў агульны стыль. Пры выбары каляровай гамы абапіраўся на дызайн аўтобуснага парка, – падзяліўся Руслан Бубновіч.
Кожная дэталь прамалёўвалася з нуля, на распрацоўку дызайну пайшло два дні. Пасля перамогі першапачатковую працу трэба было крыху дапрацаваць, але пасля гэтага яна стала толькі лепшай.
Даведачна: Свае першыя крокі ў дызайне Руслан Бубновіч пачаў рабіць яшчэ ў 13 гадоў, навучаючыся на анлайн-курсах. Сёння яго працы можна знайсці на старонках не толькі беларускіх, але і замежных сайтаў. Цяпер Руслан Бубновіч у рамках навучальнага праекта працуе над 3D-мадэллю мемарыяльнага комплексу. У планах у маладога дызайнера пачаць весці свой блог і ўзяць удзел у распрацоўцы дызайну для Дня горада 2028 года.
Навіна напісана па матэрыяле Гродзенскай праўды.
Гродзенскі дзяржаўны ўніверсітэт імя Янкі Купалы