21 студзеня ў гонар юбілею адной з самых масавых грамадскіх арганізацый Беларусі – прафсаюза работнікаў адукацыі і навукі – у Гродзенскім дзяржаўным універсітэце імя Янкі Купалы прайшоў адкрыты дыялог пад назвай «105 гадоў з людзьмі і для людзей».
Ганаровымі гасцямі свята сталі намеснік старшыні Гродзенскага абласнога аб'яднання прафсаюзаў Святлана Майніна, старшыня Гродзенскай абласной арганізацыі Беларускага прафсаюза работнікаў адукацыі і навукі Лела Шпак і прарэктар па ідэалагічнай і выхаваўчай рабоце Купалаўскага ўніверсітэта Васіль Сянько.
Пасля прывітальных слоў ва ўрачыстай атмасферы прайшло ўзнагароджанне тых, хто ўнёс важкі ўклад у работу прафсаюзнай арганізацыі. Граматамі за актыўны ўдзел у жыцці прафсаюзнага камітэта былі ўзнагароджаны начальнік аддзела культурна-масавай і забаўляльнай дзейнасці Галіна Маслова, старшы выкладчык кафедры перакладу і міжкультурнай камунікацыі факультэта гісторыі, камунікацыі і турызму Алена Антончык і інструктар-метадыст па фізкультурна-аздараўленчай і спартыўна-масавай рабоце спартыўнага клуба Марына Ясене. Таксама загадчыку кафедры архітэктуры і будаўніцтва інжынернага факультэта Яўгену Аўчыннікаву ўручылі кнігу, прысвечаную гісторыі прафсаюзнага руху.
Пасля ўшанавання пачалася навуковая частка мерапрыемства, прысвечаная экскурсу ў гісторыю прафсаюзнага руху. Загадчык кафедры гісторыі Беларусі, археалогіі і спецыяльных гістарычных дысцыплін, кандыдат гістарычных навук Сяргей Амелька выступіў з дакладам на тэму «Развіццё прафсаюзнага руху ў БССР». А дацэнт кафедры гісторыі Беларусі, археалогіі і спецыяльных гістарычных дысцыплін, кандыдат гістарычных навук, дацэнт Віталь Барабаш у сваім выступленні асвятліў развіццё прафсаюзнага руху Гродзенскай вобласці ў канцы 20 – пачатку 21 стагоддзя.
Гэтае мерапрыемства наглядна прадэманстравала, што прафсаюз быў і застаецца важнай часткай жыцця калектыву, і яго роля не слабее, а толькі ўмацоўваецца з цягам часу.
Гродзенскі дзяржаўны ўніверсітэт імя Янкі Купалы