Сёння, 15 студзеня, у Гуманітарным каледжы УА "Гродзенскі дзяржаўны ўніверсітэт імя Янкі Купалы" ў цёплай атмасферы адбылося ўрачыстае мерапрыемства "Жыццё як творчасць - Творчасць як жыццё". Свята было прысвечана 90-годдзю з дня нараджэння выдатнага паэта, Ганаровага члена Саюза пісьменнікаў Беларусі, выпускніка каледжа Віктара Сямёнавіча Кудлачова.
Віктар Кудлачоў непарыўна звязаны з гісторыяй каледжа: менавіта тут пачынаўся яго творчы шлях, і сёння бібліятэка навучальнай установы з гонарам носіць імя свайго знакамітага выпускніка. Лаўрэат прэміі імя Аляксандра Дубко і аўтар больш за 30 кніг, Віктар Сямёнавіч прысвяціў свой талент самым патрабавальным чытачам – дзецям.
Творчы вечар аб'яднаў навучэнцаў, выкладчыкаў універсітэта і каледжа, членаў Гродзенскага абласнога аддзялення Саюза пісьменнікаў Беларусі, а таксама ганаровых гасцей. У сценах каледжа гучалі не толькі афіцыйныя віншаванні, але і вельмі асабістыя гісторыі пра творчы шлях юбіляра. Праграму свята ўпрыгожылі выступленні навучэнцаў каледжа, якія з асаблівым трапятаннем чыталі ўрыўкі з вершаў Віктара Сямёнавіча.
Юбілейная ўрачыстасць стала сапраўдным святам пераемнасці пакаленняў, нагадаўшы ўсім прысутным аб тым, што сапраўдная творчасць не мае ўзросту, а жыццё, аддадзенае мастацтву і дзецям, становіцца вечным прыкладам для пераймання.
Гродзенскі дзяржаўны ўніверсітэт імя Янкі Купалы