З 1 па 5 снежня, напярэдадні Міжнароднага дня валанцёра, арганізавана рэспубліканская акцыя "Сіла валанцёрскага сэрца", якая праходзіць на базе інтэрната № 6 Гродзенскага дзяржаўнага ўніверсітэта імя Янкі Купалы.
Мэта акцыі - прыцягненне ўвагі грамадскасці да значнасці донарства крыві для выратавання жыцця людзей і папулярызацыі донарскага руху. Арганізатарамі акцыі выступілі Гродзенская абласная арганізацыя Беларускага Чырвонага Крыжа, Гродзенскі абласны цэнтр трансфузіялогіі і Гродзенскі дзяржаўны ўніверсітэт імя Янкі Купалы.
Чакаецца, што донарамі стануць каля 500 чалавек з ліку студэнтаў, выкладчыкаў універсітэта і жыхароў горада. Частка з іх стане донарамі ўпершыню, таму для гэтых людзей падрыхтаваны памятныя падарункі. Забор крыві будзе праводзіцца цэнтралізавана супрацоўнікамі Гродзенскага абласнога цэнтра трансфузіялогіі.
Сёння, 2 снежня, донарамі сталі намеснік старшыні Гродзенскага аблвыканкама Віктар Пранюк і першы прарэктар ГрДУ імя Янкі Купалы Аляксандр Карэўскі, а таксама студэнты ўніверсітэта.
Намеснік старшыні Гродзенскага абласнога выканаўчага камітэта Віктар Пранюк адзначыў, што работа па донарстве крыві вядзецца па ўсіх катэгорыях насельніцтва, але асабліва важна далучаць маладое пакаленне, каб яны ўсведамлялі каштоўнасць чалавечага жыцця.
- Беларускае таварыства Чырвонага Крыжа і Гродзенская абласная арганізацыя Беларускага Чырвонага Крыжа праводзіць ужо традыцыйную акцыю па прапагандзе бязвыплатнага донарства крыві. Мы працуем з усімі катэгорыямі насельніцтва, але вядома ж вельмі важна працаваць са студэнтамі, каб яны разумелі наколькі важнае і каштоўнае любое жыццё. Калі тут і цяпер неабходна дапамога нейкаму чалавеку, які трапіў у цяжкую жыццёвую сітуацыю, то ўзяць на сябе адказнасць і дапамагчы яму - гэта вельмі важна, - падкрэсліў Віктар Францавіч.
Наталля Мельнічук, старшыня Гродзенскай абласной арганізацыі Беларускага Чырвонага Крыжа падкрэсліла шматгадовы характар супрацоўніцтва з Гродзенскім дзяржаўным універсітэтам імя Янкі Купалы.
– Гродзенская абласная арганізацыя Беларускага Чырвонага Крыжа сумесна з Гродзенскім абласным цэнтрам трансфузіялогіі далучаецца да акцыі “Сіла валанцёрскага сэрца”. Акцыя на базе інтэрната № 6 Купалаўскага ўніверсітэта праводзіцца не ўпершыню, а ўжо на працягу пяці гадоў, – адзначыла Наталля Барысаўна.
Сваім бачаннем донарства падзяліўся студэнт 2 курса факультэта эканомікі і кіравання ГрДУ імя Янкі Купалы Дзмітрый Бараноўскі, які стаў донарам упершыню.
- Я лічу, што будучыя прафесіяналы павінны не толькі атрымліваць веды, але і фарміраваць каштоўнасці. Донарства - гэта мой свядомы крок у бок служэння людзям і ўмацавання чалавечага патэнцыялу нашай краіны.
4 снежня Гродзенская абласная арганізацыя Беларускага Чырвонага Крыжа правядзе мерапрыемства "Валанцёр года - 2025", якое ўключае ў сябе інтэрактыўныя пляцоўкі.
Мерапрыемства праводзіцца з мэтай прыцягнення ўвагі грамадскасці да валанцёрства, падтрымкі і развіцця валанцёрскага руху Беларускага Чырвонага Крыжа, грамадскіх аб'яднанняў, а таксама ўшаноўвання пераможцаў абласнога конкурсу Беларускага Чырвонага Крыжа "Лепшы валанцёр 2025 года" ў 13 намінацыях: "Лепшы валанцёр-лідар". «Валанцёрскі дэбют», «Самы актыўны валанцёр», «Лепшы валанцёр па аказанні дапамогі ўразлівым людзям», «Лепшы валанцёр па працы з дзецьмі», «Лепшы валанцёр па навучанні першай дапамозе», «Лепшы валанцёр па прасоўванні ЗЛЖ», «Лепшы валанцёр па прасоўванні бязвыплатнага донарства», «Лепшы валанцёр сярэбранага ўзросту» і «Лепшы валанцёр Гран-пры».
Акрамя таго, на мерапрыемстве адбудзецца ўзнагароджанне найлепшых валанцёраў Гродзенскага абласнога камітэта ГА "БРСМ" і Гродзенскай абласной арганізацыі "Беларускі саюз жанчын".
Мерапрыемства пройдзе на базе Гродзенскага дзяржаўнага абласнога Палаца творчасці дзяцей і моладзі з 10:00 да 11:00 па адрасе: г. Гродна, Каложскі парк, 1.
Гродзенскі дзяржаўны ўніверсітэт імя Янкі Купалы