У чэмпіянаце бяруць удзел каманды з Гродзенскага дзяржаўнага ўніверсітэта імя Янкі Купалы, Беларускага дзяржаўнага ўніверсітэта, Беларускага дзяржаўнага ўніверсітэта інфарматыкі і радыёэлектронікі, Беларускага нацыянальнага тэхнічнага ўніверсітэта, Беларускай дзяржаўнай акадэміі авіяцыі, Беларускага дзяржаўнага ўніверсітэта транспарту і Беларускага дзяржаўнага медыцынскага ўніверсітэта. Кожная каманда гатова заваяваць чэмпіёнскі тытул.

Чэмпіянат па міні-футболе на ваенным факультэце праходзіць упершыню, аднак, паводле слоў начальніка кафедры тэорыі і арганізацыі фізічнай падрыхтоўкі ваеннаслужачых ваеннага факультэта ГрДУ імя Янкі Купалы Паўла Кірмеля, гэта не перашкодзіць правесці яго на высокім арганізацыйным узроўні. Таксама ён падзяліўся тым, як рыхтаваліся каманды да чэмпіянату.

– З кожнай камандай праходзілі вучэбна-трэніровачныя зборы, таксама яны рыхтаваліся і на месцах. Па сутнасці, планавая падрыхтоўка да гэтых спаборніцтваў ідзе з новага навучальнага года. Я думаю, што будуць паказаны высокія спартовыя вынікі, і мы ўбачым добрую гульню.

Спаборніцтвы праходзяць па кругавой сістэме, даючы магчымасць кожнай камандзе згуляць адно з адным. Пераможца турніру будзе вызначаны па найбольшай суме балаў.

Перад пачаткам матчаў начальнік цыкла агульнаваенных дысцыплін агульнавайсковай кафедры ваеннага факультэта ГрДУ імя Янкі Купалы Дзмітрый Гарошка пажадаў камандам дастойнай перамогі, футбола без траўматызму і паказаць цудоўныя вынікі.

Варта адзначыць, што па выніках чэмпіянату будуць адабраны лепшыя ігракі і сфарміравана зборная каманда ваенных факультэтаў універсітэтаў і інстытута, якая прыме ўдзел у Чэмпіянаце Узброеных Сіл Рэспублікі Беларусь.