З 18 па 20 верасня ў Кастрамскім дзяржаўным універсітэце адбылася VII Міжнародная навукова-практычная канферэнцыя «Псіхалогія стрэсу і паводзіны саўладання: рэсурсы і ўстойлівасць у свеце нявызначанасці». У навуковай падзеі прынялі ўдзел навукоўцы Купалаўскага ўніверсітэта.Канферэнцыя з'яўляецца адной з найбуйнейшых падзей у галіне псіхалогіі на прасторы СНД. Штогод яна аб'ядноўвае ў змешаным фармаце больш за 200 вучоных-псіхолагаў з блізкага і далёкага замежжа. Факультэт псіхалогіі Гродзенскага дзяржаўнага ўніверсітэта імя Янкі Купалы традыцыйна выступае адным з суарганізатараў мерапрыемства.
У гэтым годзе з навуковымі дакладамі выступілі прадстаўнікі навукова-педагагічнай школы «Псіхалогія жыццёвага шляху асобы» пад кіраўніцтвам Канстанціна Карпінскага, доктара псіхалагічных навук, прафесара, загадчыка кафедры эксперыментальнай і прыкладной псіхалогіі ГрДУ імя Янкі Купалы.
Даследаванні навукоўцаў ахапілі дзве актуальныя для сучаснага грамадства тэмы: псіхалогію падлеткавага ўзросту і псіхалогію асобы ва ўмовах экстрэмальнай макрасацыяльнай сітуацыі. Марына Карняловіч, дацэнт кафедры эксперыментальнай і прыкладной псіхалогіі, прадэманстравала вынікі даследавання «Успрыманыя бацькоўскія адносіны і стратэгіі копінгу ў старэйшых падлеткаў». Дацэнт кафедры эксперыментальнай і прыкладной псіхалогіі Таццяна Парфёнава прадставіла даклад на тэму «Суб'ектыўнае перажыванне тэракту ў «Крокус-Сіці-Хол» беларусамі ва ўмовах расійска-ўкраінскага ваеннага канфлікту».
Выступленні вучоных ГрДУ імя Янкі Купалы выклікалі жывую цікавасць і дыскусію сярод удзельнікаў канферэнцыі. Іх работы ўносяць значны ўклад у развіццё навуковай школы ўніверсітэта і ўмацоўваюць яго міжнародны аўтарытэт у галіне псіхалагічнай навукі.
