На думку Святланы Шушкевіч, выкладчыкам трэба больш уважліва ставіцца да асваення і разумення асноў навуковага падыходу да тэсціравання – да таго, каб распрацоўваць і ўкараняць тэсты на аснове дакладных працэдур і ацэначных крытэрыяў. «Цяпер у вучэбнай дзейнасці найбольш запатрабаваны тэсты дасягненняў, прызначаныя для ацэнкі засваення ведаў па канкрэтных дысцыплінах, і навучальныя тэсты, – адзначыла мадэратар семінара. – Тэсты з навучальным эфектам дазваляюць актывізаваць працэс навучання, з іх дапамогай можна распрацоўваць заданні ў адпаведнасці з узроўнем падрыхтоўкі студэнтаў і рэалізоўваць у выніку індывідуальны падыход у навучанні».

Мадэратар семінара надала вялікую ўвагу асноўным этапам распрацоўкі дыдактычных тэстаў, падрабязна разгледзела розныя варыянты разліку іх паказчыкаў. Было падкрэслена, што аналіз тэставых заданняў з дапамогай матэматычных метадаў дазваляе атрымаць інфармацыю аб іх схаваных магчымасцях, якія не ўдаецца выявіць з дапамогай метадаў экспертных адзнак. Святлана Шушкевіч падкрэсліла, што трэба ўлічваць такія паказчыкі якасці тэставых заданняў як надзейнасць, валіднасць і рэпрэзентатыўнасць.

Падчас абмеркавання ўдзельнікі семінара закранулі тэмы добрых якасцяў і абмежаванняў тэставых заданняў як формы кантролю і навучання студэнтаў, падзяліліся асабістымі назіраннямі, меркаваннямі і ацэнкамі.

28 сакавіка адбудзецца чарговы семінар праекта "Адкрытае навучанне". Вопытам арганізацыі і правядзення хакатона для студэнтаў-дызайнераў падзеліцца старшая выкладчыца кафедры дызайну Наталля Паўленка. Мерапрыемства пачнецца а 15:05 у аўдыторыі 218а галоўнага корпуса ГрДУ імя Янкі Купалы па адрасе вуліца Ажэшкі, 22.

Рэфлексія ўдзельнікаў семінара

"Дзякуй мадэратару за глыбіню і адданасць прафесіі". Антаніна Семак, старшы выкладчык кафедры ўзроставай і педагагічнай псіхалогіі.

«Тэма семінара аказалася невычэрпнай!» Алеся Мароз, старшы выкладчык кафедры паліталогіі і сацыялогіі, магістр упраўлення.

"Семінар яшчэ раз паказаў, што няма мяжы дасканаласці, нават калі гэта знаёмая тэма!" Ларыса Альшэўская, загадчык вучэбна-метадычнага кабінета адукацыйных тэхналогій педагагічнага факультэта, магістр педагагічных навук.