Працоўная моладзь сустрэлася з прарэктарам па выхаваўчай рабоце Васілём Сянько і начальнікам аддзела падтрымкі і рэалізацыі моладзевых праектаў і ініцыятыў Інай Астроўскай.

У ходзе сустрэчы камандзіры студэнцкіх атрадаў распавядалі аб сваёй працы, арганізацыйных аспектах і важнасці зладжанай каманднай працы. Яны дзяліліся сваімі поспехамі, а таксама найбольш эфектыўнымі методыкамі і практыкамі, якія палягчаюць працу каманд.

Прадстаўнікі студэнцкіх атрадаў былі актыўнымі ў дыялогу з адміністрацыяй. Яны зрабілі акцэнт на значнасці сацыяльнай работы і ўдзелу ў важных праектах і ініцыятывах. Студэнты выказвалі прапановы па ўдасканаленні арганізацыі атрадаў і стварэнні яшчэ больш прывабных магчымасцяў для ўдзелу ў іх.

Студэнты працавалі ў розных напрамках: у педагагічным-дзіцячыя аздараўленчыя лагеры горада Гродна і Мінскай вобласці; у вытворчым − на заводах горада Гродна і Мінска; у будаўнічым − у інтэрнатах і навучальных карпусах універсітэта, на Усебеларускай маладзёжнай будоўлі ў горадзе Астравец, а таксама на будаўнічых аб'ектах у Грандзічах; у сэрвісным − прыёмная камісія, цэнтралізаванае тэсціраванне, на Беларускай чыгунцы, а таксама ў сферы абслугоўвання. Адзначым, што купалаўцы сфармавалі выязныя педагагічныя і сэрвісныя атрады ў Расійскай Федэрацыі.

Дыялогавая пляцоўка стала ідэальным месцам для наладжвання кантактаў і супрацоўніцтва паміж камандзірамі, камісарамі і ўдзельнікамі студэнцкіх атрадаў. Яна дазволіла стварыць адзіны фронт і кірунак працы ў рамках студэнцкай супольнасці.

Сустрэча прайшла напярэдадні ўрачыстага закрыцця трэцяга працоўнага семестра, якое адбудзецца 5 кастрычніка.