Кіруе школай загадчык кафедры батанікі Гродзенскага дзяржаўнага ўніверсітэта імя Янкі Купалы, доктар біялагічных навук Алег Созінаў. Удзельнікамі школы сталі 10 настаўнікаў біялогіі, хіміі і геаграфіі.

Дзейнасць летняй школы накіравана на ўдасканаленне якасці падрыхтоўкі спецыялістаў, уцягванне педагогаў і навучэнцаў у даследчую дзейнасць, павышэнне выніковасці выступлення вучняў раёна ў інтэлектуальных і творчых конкурсах.

Дырэктар Навадворскай сярэдняй школы Свіслацкага раёна Ала Ганчарэвіч распавяла пра тое, што ўстанова на працягу многіх гадоў працуе як раённы рэсурсны цэнтр па фарміраванні экалагічнай культуры школьнікаў, мы навучаем і педагогаў, і дзяцей.

Летняя экалагічная школа праходзіць у рамках абласнога этапу Усебеларускай маладзёжнай экспедыцыі «Маршрутамі памяці. Маршрутамі адзінства», арганізатарамі якой выступаюць Міністэрства адукацыі, а ва ўстановах Гродзенскай вобласці – Галоўнае ўпраўленне адукацыі Гродзенскага аблвыканкама. Арганізацыйнае і метадычнае суправаджэнне ажыццяўляецца Гродзенскім абласным цэнтрам турызму і краязнаўства.

Удзельнікі летняй экалагічнай школы прайшлі два этапы экспедыцыі, цяпер яны працуюць на экалагічнай сцежцы «Белавежская» Нацыянальнага парку «Белавежская пушча». Працягласць сцежкі-8 кіламетраў, яна праходзіць па запаведнай зоне, адна з стаянак захоплівае пункт маніторынгу Нацыянальнай акадэміі навук. Дзейнасць удзельнікаў школы накіравана на тое, каб зрабіць сцежку, стаянкі на ёй яшчэ больш прывабнымі для моладзі. Плануецца, што работа экалагічнай школы стане традыцыйнай і праект будзе маштабавацца.

Сярод удзельнікаў школы трое маладых спецыялістаў: Павел Аніська і Дзіяна Бабіля з сярэдняй школы № 2 ім. М. п.Масонава Свіслачы і Ганна Архіпава з Навадворскай сярэдняй школы. Адзначым, што Ганна Архіпава толькі прыехала па размеркаванні ў Навадворскую школу і адразу ж адправілася з калегамі ў Белавежскую пушчу ўладкоўваць сцежку, а з 1 верасня выпускніца Гродзенскага дзяржаўнага ўніверсітэта імя Янкі Купалы пачне выкладаць школьнікам біялогію і хімію.

Нагадаем, што 8 жніўня ў ГрДУ імя Янкі Купалы была падпісаная дамова аб супрацоўніцтве са Свіслацкім раённым выканаўчым камітэтам. Гэта падзея пацвердзіла і ўмацавала супрацоўніцтва, вызначыла новыя перспектывы ўзаемадзеяння.