На сустрэчы прысутнічалі старшыня Гродзенскага абласнога Савета дэпутатаў Алена Пасюта, намеснік начальніка УАПП МГБ УУС Аляксандр Гележа, старшы інспектар па асобых даручэннях упраўлення аховы правапарадку і прафілактыкі УУС Сяргей Крупіца, а таксама прарэктар па выхаваўчай рабоце ГрДУ імя Янкі Купалы Васіль Сянько.

Пытанні госцю маглі задаць прадстаўнікі ваенна-патрыятычных клубаў, маладзёжных атрадаў аховы правапарадку, а таксама студэнты Купалаўскага ўніверсітэта.

У прывітальнай прамове да аўдыторыі Ігар Тур расказаў пра сябе, падзяліўся сваім бачаннем працы з сучаснай моладдзю і выказаў надзею на вострыя пытанні прысутных.

- Самае галоўнае, на мой погляд, для дзяржавы - гэта тое, што нам патрэбна розная моладзь, і хуліганы ў тым ліку. З такімі хлопцамі мы, трэба прызнаць, неяк пабойваліся працаваць, бо ўсім зручней, калі дзеці паслухмяныя. Але, паводле маіх назіранняў, большасць людзей, якія чагосьці дамагаюцца ў жыцці, у дзяцінстве былі хуліганамі. Таму мой пасыл: калі вы хочаце хуліганіць, хуліганце ў патрэбным дзяржаве напрамку, а дарослыя не павінны гэтаму перашкаджаць, - адзначыў аўтар праграмы «Прапаганда» на тэлеканале ОНТ Ігар Тур.

Госць са сталіцы адразу абазначыў: сустрэча не павінна ператварыцца ў маналог, увесь яе сэнс - у зададзеных пытаннях. Удзельнікі адкрытага дыялогу задалі спікеру нямала пытанняў, якія датычыліся палітыкі, работы з інфармацыяй, работы з дзецьмі, маральных каштоўнасцей і іншых. Так, па просьбе аўдыторыі Ігар Тур распавёў пра этапы стварэння праграмы «Прапаганда», пра тое, як і колькі чалавек працуе разам з ім пры падрыхтоўцы выпуску, пра адрозненні ў працы журналіста і прапагандыста, пра тое, чаму ён стаў палітычным аглядальнікам. Таксама спікер падзяліўся меркаваннем наконт дзейнасці незалежных СМІ і аб недахопах у грамадстве.

Студэнты не ўпусцілі магчымасці пацікавіцца ў Ігара Тура, як журналіста, які суправаджае Прэзідэнта РБ, асабістымі якасцямі Аляксандра Рыгоравіча.

Дыскусійная пляцоўка працавала каля дзвюх гадзін. Ігар Тур, як заўсёды, быў эмацыйны, зносіны атрымаліся жывымі і цікавымі. А тыя пытанні, якія не паспелі прагучаць на сустрэчы, госць прапанаваў задаць яму ў любых сацыяльных сетках.

Сустрэча скончылася памятным фота.

У гэты ж дзень у холе другога паверха ўніверсітэта адбылася выстава-прэзентацыя ваенна-патрыятычных клубаў і ўзбраення АМАП УУС Гродзенскага аблвыканкама.