Абласны этап сёлета прымаў Гродзенскі дзяржаўны медыцынскі ўніверсітэт, бо летась прадстаўнік менавіта гэтай ВНУ стаў студэнтам года ў Гродзенскай вобласці. Атмасфера ў ГрДМУ панавала цудоўная! Удзельнікі пастараліся на славу, а групы падтрымкі не скупіліся на гаворкі і лозунгі. Купалаўскі ўніверсітэт на абласным этапе прадставілі студэнтка 3 курса філалагічнага факультэта Лізавета Фёдарава, студэнт 3 курса факультэта матэматыкі і інфарматыкі Яўген Занеўскі і студэнтка 3 курса факультэта гісторыі, камунікацыі і турызму Віялета Шаблінская, якая перамагла ў конкурсе!

Віялета - старшыня студэнцкай мастацкай рады ГрДУ імя Янкі Купалы, выступае ў якасці члена арганізацыйнага камітэта і члена журы пры правядзенні розных універсітэцкіх конкурсаў. Студэнтка прыняла ўдзел у мерапрыемстве, прысвечаным Дню Незалежнасці Рэспублікі Беларусь у Палацы Рэспублікі, удзельнічала ў фестывалі "Славянскі базар у Віцебску", у Рэспубліканскім навагоднім балі. Упэўнены, яна годна прадставіць нашу вобласць на рэспубліканскім этапе конкурсу "Студэнт года - 2022"

Мы верылі ў перамогу купалаўцаў! Шчыра віншуем Віялету і жадаем удачы!

Конкурс "Студэнт года" традыцыйна з'яўляецца адным з самых яркіх студэнцкіх праектаў, заснавальнікам якога з 2011 года выступае Беларускі рэспубліканскі саюз моладзі. Як адзначаюць арганізатары, ён накіраваны на развіццё лідарскіх якасцей, падтрымку творчага патэнцыялу студэнцкай моладзі, стварэнне ўмоў для яе самарэалізацыі ў галіне грамадскай дзейнасці, навукі, мастацтва і спорту, а таксама на прасоўванне студэнцкіх ініцыятыў і праектаў, павышэнне прэстыжу ведаў і папулярызацыю прафесіі.