На гэты момант у ліку рэзідэнтаў Навукова-тэхналагічнага парка 31 прадпрыемства. Кампаніі працуюць у самых розных сферах. Не губляе сваёй запатрабаванасці IT-сфера, новы напрамак - электрыфікацыя традыцыйнага транспарту і электратранспарт. Акрамя таго, ёсць рэзідэнты, якія займаюцца электронным маркетынгам, BIM-інжынірынгам, распрацоўкай абсталявання, у тым ліку навучальнага.Рэктар Гродзенскага дзяржаўнага ўніверсітэта імя Янкі Купалы Ірына Кітурка правяла рабочую сустрэчу з рэзідэнтамі Тэхнапарка для таго, каб бліжэй пазнаёміцца з нядаўна прынятымі кампаніямі, а таксама выслухаць прапановы і пажаданні рэзідэнтаў. Як адзначыла Ірына Фёдараўна, універсітэт трымае цесную сувязь з прадпрыемствамі і гатовы аказаць усебаковую падтрымку іх ініцыятыў. Тым больш, што ГрДУ імя Янкі Купалы мае моцны навуковы патэнцыял, які будзе карысны рэзідэнтам.
У ходзе рабочай сустрэчы кіраўнікі прадпрыемстваў абмеркавалі, як можна паглыбіць супрацоўніцтва, прыцягнуць студэнтаў на вытворчасць, а таксама пагаварылі і аб падрыхтоўцы навуковых супрацоўнікаў у інтарэсах кампаній.
