Абітурыентамі Гродзенскай вобласці ў чатырох пунктах цэнтралізаванага тэсціравання выканана 17 238 тэстаў з 17 887 зарэгістраваных, што складае 96,4 працэнта ад усіх зарэгістраваных на ЦТ тэстаў.
Для абітурыентаў, якія прапусцілі ЦТ па ўважлівай прычыне, даецца магчымасць з 2 па 7 ліпеня зарэгістравацца для праходжання ЦТ у рэзервовыя дні.
Рэгістрацыя на рэзервовыя дні, як і тэсціраванне, праводзіцца ў Гродзенскім дзяржаўным універсітэце імя Янкі Купалы. Для гэтага неабходна прайсці рэгістрацыю па адрасе: г.Гродна, зав. Тэлеграфны, 15а і атрымаць пропуск.
На гэты момант на рэзервовыя дні ўжо зарэгістраваны 45 абітурыентаў для выканання 53 тэстаў.
Тэсціраванне ў Гродзенскай вобласці, як адзначаюць прадстаўнікі абласной камісіі па кантролі за ходам правядзення ўступнай кампаніі, арганізавана прафесійна і праходзіць у спакойнай і добразычлівай абстаноўцы, без парушэнняў, у камфортных умовах.
Атрымаць сертыфікаты абітурыенты могуць з 14 ліпеня. А для тых, хто выканае ЦТ у рэзервовыя дні, сертыфікаты будуць выдавацца з 21 ліпеня 2022 года.