Удзел у навуковым форуме ў гонар выдатнага ўраджэнца Гродзеншчыны, вучонага-славіста, фалькларыста, этнографа, акадэміка Яўхіма Фёдаравіча Карскага прынялі больш за 100 вучоных з Беларусі, Расіі, Польшчы, Славакіі, Сербіі, Балгарыі.

Звяртаючыся з прывітальным словам да ўдзельнікаў канферэнцыі на адкрыцці XVI Міжнародных Карскіх чытанняў, рэктар універсітэта Ірына Фёдараўна Кітурка адзначыла, што ў рамках чытанняў за больш чым 30-гадовую гісторыю склаліся добрыя традыцыі, адна з якіх - знаёмства ўдзельнікаў канферэнцыі з жыццём, прафесійнай дзейнасцю, спадчынай. Яўхіма Фёдаравіча Карскага, нашага земляка, ураджэнца Гродзеншчыны. Асабліва каштоўна, на думку рэктара, што ўдзел у навуковым форуме на працягу многіх гадоў прымае праўнук першага беларускага акадэміка Аляксандр Аляксандравіч Карскі, з якім арганізатар канферэнцыі - кафедра журналістыкі факультэта гісторыі, камунікацыі і турызму - падтрымлівае добрыя адносіны.

Першая частка пленарнага пасяджэння, якое адбылося 5 мая, была прысвечана Карскіане – дакладам, падрыхтаваным па архіўных дакументах, якія дапаўняюць гісторыю жыцця і дзейнасці Яўхіма Фёдаравіча Карскага. Дэкан факультэта гісторыі, камунікацыі і турызму Віктар Белазаровіч расказаў пра ролю Яўхіма Карскага ў фарміраванні беларускай нацыянальнай гістарычнай канцэпцыі. Ганаровы госць Карскіх чытанняў праўнук вялікага вучонага падзяліўся гісторыяй публікацыі ліста Карскага да Доўнар-Запольскага ад 10 снежня 1896 года.

У другі дзень канферэнцыі, 6 мая, удзельнікі чытанняў прадставілі даклады на Міжнародным навуковым семінары "Лічбавае жыццё нацыянальных медыясістэм і нацыянальных моў", а таксама ў шасці секцыйных пасяджэннях. Адна з секцый, «Я.Ф. Карскі і яго сучаснікі на пераломе стагоддзяў», адбылася на пляцоўцы Гімназіі №1 імя акадэміка Я.Ф. Карскага. Для ўдзельнікаў секцыі была арганізавана экскурсія па музеі першага беларускага акадэміка, які функцыянуе на базе гімназіі.

Праграма навуковага форуму была насычаная мерапрыемствамі. Больш за тое, для студэнтаў ГрДУ імя Янкі Купалы ў рамках праграмы "Запрошаны прафесар" удзельнікі XVI Міжнародных Карскіх чытанняў прачыталі курсы лекцый: Міхальчанка Сяргей Іванавіч, доктар гістарычных навук, прафесар, дырэктар інстытута эканомікі, гісторыі і права Бранскага дзяржаўнага ўніверсітэта імя акадэміка І.Г. Пятроўскага, Дускаева Лілія Рашыдаўна, доктар філалагічных навук, прафесар, загадчык кафедры медыялінгвістыкі Санкт-Пецярбургскага дзяржаўнага ўніверсітэта, Карасік Уладзімір Ільіч, доктар філалагічных навук, прафесар, прафесар кафедры агульнага і рускага мовазнаўства Дзяржаўнага інстытута рускай мовы імя А. С. Пушкіна, Градюшка Аляксандр  Аляксандравіч, кандыдат філалагічных навук, дацэнт, дацэнт кафедры перыядычнага друку і вэб-журналістыкі Беларускага дзяржаўнага ўніверсітэта.