Протаіерэй Георгій Рой пасля супольнай малітвы прывітаў усіх прысутных і адкрыў вечар: «Творчасць і само жыццё паэта прымушаюць пра многае задумацца. Сяргей Ясенін чалавек з вельмі няпростым лёсам. Можна сказаць, што ён быў і блудадзеем, і грэшнікам, але з хрысціянскага пункту гледжання гэта не мае роўна ніякага значэння, калі чалавек здзейсніў самае галоўнае ў сваім жыцці - подзвіг пакаяння, калі чалавек адкупіў свае грахі».
Дацэнт кафедры ўсеагульнай і славянскай гісторыі ГрДУ імя Янкі Купалы Наталля Леанідаўна Улейчык распавяла аб напоўненым таямніцамі жыццёвым шляху Сяргея Ясеніна.
Ацаніла творчасць і падзялілася «адчуваннем» Сяргея Ясеніна аспірант кафедры рускай і замежнай літаратуры ГрДУ імя Янкі Купалы Вольга Сяргееўна Агапонова: «Можа быць, Сяргей Ясенін сказаў бы ўсім прысутным у зале: "Дарагія мае, добрыя!" Або з'явіўся са свістам, крыкам, шумам і скандалам, каб чытаць свае вершы. Мы ведаем, што чалавечая натура супярэчлівая. Куды больш супярэчлівая творчая натура. Жыццё і творчасць Сяргея Ясеніна гэтаму пацверджанне. Мабыць, маё сённяшняе выступленне пра гэта, пра супярэчнасці жыцця і смерці ў творчасці паэта».
Перад удзельнікамі сустрэчы з дакладам «Уплыў Сяргея Ясеніна на беларускіх паэтаў» выступіў арганізатар вечара - клірык Свята-Пакроўскага кафедральнага сабора іерэй Павал Каспяровіч. Ён адзначыў, што беларускія паэты, сярод якіх Ніл Гілевіч, Аркадзь Куляшоў, Паўлюк Трус, перакладалі творы Сяргея Ясеніна і ўспадкавалі яго стыль. Таксама айцец Павел прадставіў цікавы факт пра вершы «Дай, Джым, на шчасце лапу мне ...»: у творы гаворка ідзе пра сабаку, якая належыла вядучаму акцёру трупы К.С. Станіслаўскага Васілю Качалаву, які ў савецкі час нікому не давяраў таямніцу аб сваім не пралетарскім паходжанні, нават свайму «чатырохногаму» аднаму Джыму (заўв.: Качалаў Васіль Іванавіч (Шверубовіч) нарадзіўся 30 студзеня (11 лютага) 1875 ў Вільні ў сям'і святара).
Дацэнт кафедры польскай філалогіі ГрДУ імя Янкі Купалы Анатолій Аляксандравіч Брусевіч, выступаючы перад аўдыторыяй, падкрэсліў, што палякі звярнуліся да творчасці паэта яшчэ пры яго жыцці, і на прыкладах патлумачыў гістарычныя, рэлігійныя, лінгвістычныя асаблівасці стылю паэта і праблемы перакладу творчасці Сяргея Ясеніна на польскую мову.
У канцы вечара перад удзельнікамі сустрэчы з музычнымі нумарамі выступілі студэнты факультэта мастацтваў і дызайну ГрДУ імя Янкі Купалы вакаліст Андрэй Дактароў і гітарыст Дзмітрый Харошка, а таксама гарадзенскі бард Таццяна Салаўёва.
Паводле інфармацыі сайта Свята-Пакроўскага
кафедральнага сабора ў Гродне