Конкурс "Лепшая група ўніверсітэта - 2022" пройдзе ў ГрДУ імя Янкі Купалы з 21 сакавіка па 21 красавіка. Спаборніцтва заклікана раскрыць творчы патэнцыял навучальных груп універсітэта і згуртаваць студэнтаў у працэсе падрыхтоўкі. Прыняць удзел у ім могуць навучальныя групы ўсіх факультэтаў дзённай формы навучання.Лепшую групу ўніверсітэта будуць вызначаць у два этапы. Завочны этап спаборніцтва прадугледжвае конкурс партфоліё "Мы - каманда" і конкурс відэаролікаў "Наш гурт лепш за ўсіх". У рамках конкурсу партфоліё ўдзельнікі павінны прадставіць аргкамітэту матэрыялы, якія адлюстроўваюць дасягненні студэнтаў групы ў вучобе, навуцы, творчасці, грамадскай і спартыўнай дзейнасці, а ў якасці працы на конкурс відэаролікаў арганізатары чакаюць ад удзельнікаў відэагісторыю аб сваёй групе.
У фінале конкурсу, які адбудзецца ў Купалаўскім універсітэце 21 красавіка, пройдзе конкурс "Прэзентацыя групы", дзе рабятам неабходна будзе прэзентаваць сябе ў любой творчай форме, і творчы конкурс, дзе гурты прадставяць выступленні розных жанраў, дэманструючы таленты і ўменні ўдзельнікаў.
Заяўкі на ўдзел у конкурсе прымаюцца да 23 сакавіка на электронны адрас: csi@grsu.by. Па ўсіх пытаннях звяртацца ў аргкамітэт на адрас: вул. Ажэшкі, 22, каб. 308 (кантактны тэлефон: 39 72 09).