Прадстаўляючы новага прарэктара па навуковай рабоце, рэктар ГрДУ імя Янкі Купалы Ірына Кітурка зазначыла, што ён сапраўдны Купалавец, чалавек, верны сваёй справе і alma mater.

- Андрэй Францавіч рос разам з нашым універсітэтам, у ім спалучаюцца выдатныя прафесійныя і чалавечыя якасці. У калектыве пад яго кіраўніцтвам заўсёды дружалюбная і спрыяльная для прадуктыўнай дзейнасці атмасфера, - падкрэсліла Ірына Фёдараўна. - Ва ўніверсітэце няма лёгкіх для працы ўчасткаў, кожны сектар важны, але навуковая дзейнасць адыгрывае вельмі вялікую ролю, бо яе якасць робіць універсітэт універсітэтам.

Андрэй Францавіч падзякаваў усім і Ірыне Фёдараўне за аказаны яму гонар. Ён адзначыў, што прыкладзе ўсе намаганні, каб навука ва ўніверсітэце развілася імкліва і эфектыўна.

- Ва ўніверсітэце шмат добрых людзей і мне вельмі пашанцавала працаваць бок аб бок з імі. Сярод калегаў нямала маіх настаўнікаў, якія дапамаглі мне стаць тым, кім я зараз з'яўляюся, – падзяліўся Андрэй Праневіч.

Андрэй Францавіч Праневіч у 2001 г. Гродзенскі дзяржаўны ўніверсітэт імя Янкі Купалы. Вучыўся ў аспірантуры Купалаўскага ўніверсітэта, кандыдат фізіка-матэматычных навук, мае вучонае званне дацэнта.

Прафесійны шлях у Гродзенскім дзяржаўным універсітэце імя Янкі Купалы Андрэй Праневіч пачаў у 2005 годзе на пасадзе выкладчыка, пазней - дацэнта кафедры матэматычнага і інфармацыйнага забеспячэння эканамічных сістэм. Таксама займаў пасаду начальніка аддзела падрыхтоўкі і атэстацыі кадраў вышэйшай навуковай кваліфікацыі. У мінулым годзе быў прызначаны на пасаду загадчыка кафедры матэматычнага і інфармацыйнага забеспячэння эканамічных сістэм.