Рэктар ГрДУ імя Янкі Купалы Ірына Кітурка і прарэктар па вучэбнай рабоце Юрый Бялых наведалі Ташкенцкі дзяржаўны юрыдычны ўніверсітэт і правялі перагаворы з кіраўніцтвам замежнага ўніверсітэта і яго каледжаў па фарміраванні сувязей, узгадненні прыярытэтных напрамкаў узаемадзеяння ў навукова-адукацыйнай і культурнай сферах.Гродзенскі дзяржаўны ўніверсітэт імя Янкі Купалы і Ташкенцкі дзяржаўны юрыдычны ўніверсітэт ужо маюць сваю гісторыю супрацоўніцтва. У красавіку 2020 года ў анлайн-фармаце кіраўніцтвам універсітэтаў праведзены перамовы па ўстанаўленні супрацоўніцтва, заключана міжвузаўская дамова з Ташкенцкім дзяржаўным юрыдычным універсітэтам.
З 2020-2021 навучальнага года ВНУ-партнёрамі ажыццяўляецца рэалізацыя сумеснай адукацыйнай праграмы па спецыяльнасці "Міжнароднае права", адкрыццё якой адбылося ў анлайн-рэжыме ў кастрычніку 2020 года з удзелам рэктараў універсітэтаў.
У час цяперашніх перагавораў бакі абмеркавалі механізм аптымізацыі сумесных адукацыйных праграм "3+1" і "2+2" па падрыхтоўцы спецыялістаў па спецыяльнасці "Міжнароднае права", якія ўжо паспяхова працуюць.
Бакі абмеркавалі ўдзел ташкенцкіх калег у навукова-адукацыйных праграмах Купалаўскага ўніверсітэта, акадэмічную мабільнасць студэнтаў і выкладчыкаў. Кіраўніцтва ўніверсітэтаў вяло перамовы па сумесным правядзенні шэрагу навуковых мерапрыемстваў – XXIV Міжнароднай навукова-практычнай канферэнцыі “Сучасныя праблемы юрыдычнай навукі і практыкі ва ўмовах глабалізацыі грамадскіх адносін”, XXII Міжнароднай навуковай канферэнцыі студэнтаў, магістрантаў і аспірантаў “Узаемадзеянне прававых сістэм сучаснасці ў мэтах устойлівага развіцця грамадства".
У рамках візіту прайшлі сустрэчы са студэнтамі і навучэнцамі каледжаў Ташкенцкага дзяржаўнага юрыдычнага ўніверсітэта і прафарыентацыйная работа.
