У хуткім часе стартуе традыцыйная дабрачынная рэспубліканская акцыя "Нашы дзеці". Валанцёрскі цэнтр універсітэта запрашае купалаўцаў далучыцца да яе і стаць "чараўніком".
Для таго, каб здабыць "магічныя" здольнасці, не трэба праходзіць складаныя квэсты і выпрабаванні! Дастаткова здзейсніць мару дзіцяці. Сёлета 102 лісты чакаюць тых, хто гатовы выканаць запаветныя жаданні выхаванцаў Васілішкаўскага дома-інтэрната.
Кожны ліст - гэта асобнае жыццё са сваімі перажываннямі, думкамі, эмоцыямі. І ў сілах кожнага зрабіць маленькі цуд і выканаць мару дзіцяці. Як правіла, жаданні ў рабят вельмі прыземленыя. У падарунак яны жадаюць тое, што ў нашым паўсядзённым жыцці не мае якога-небудзь сакральнага сэнсу. Гэта могуць быць музычныя калонкі, навушнікі, канструктар, цёплыя шкарпэткі, сродкі асабістай гігіены...
Аб сваім жаданні стаць «чараўніком» трэба заявіць да 10 снежня, звярнуўшыся ў Валанцёрскі цэнтр, размешчаны ў навучальным корпусе па вуліцы Ажэшкі, 22, у кабінет 228. Прынесці падарунак трэба будзе да 23 снежня. І тады жаданні выхаванцаў Васілішкаўскага дома-інтэрната выканаюцца да Новага года.
Давайце дапаможам дзецям акунуцца ў чароўную атмасферу Калядаў і Новага года і зробім іх свята па-сапраўднаму радасным і вясёлым.