У ходзе пасяджэння першы прарэктар ГрДУ імя Янкі Купалы Юрый Раманоўскі пазначыў стратэгічныя мэты ўніверсітэта да 2025 года, распавёў удзельнікам мерапрыемства аб мадэлях удасканалення сістэмы кіравання ўніверсітэтам, а таксама аб магчымасцях, якімі могуць скарыстацца маладыя спецыялісты для рэалізацыі сваіх ініцыятыў. Загадчык кафедры крымінальнага права, крымінальнага працэсу і крыміналістыкі Рыма Ключко надала ўвагу пытанню прафілактыкі і папярэджанню карупцыйных злачынстваў і правапарушэнняў. А прарэктар па выхаваўчай рабоце Гродзенскага дзяржаўнага ўніверсітэта імя Янкі Купалы Васілій Сянько акцэнтаваў увагу маладых спецыялістаў на іх ролі ў духоўна-маральным і патрыятычным выхаванні моладзі.

Затым старшыня прафсаюзнага камітэта работнікаў універсітэта Ігар Кергет прадставіў мерапрыемствы, накіраваныя на сацыяльную падтрымку маладых спецыялістаў у ГрДУ імя Янкі Купалы, а таксама закрануў у сваім выступе пытанні, якія тычацца забеспячэння маладых спецыялістаў жыллём. Старшыня Савета маладых спецыялістаў Дыяна Літвінчук прадставіла ўвазе ўдзельнікаў пасяджэння даклад аб рабоце Савета ў мінулым навучальным годзе. Падчас пасяджэння быў пераабраны персанальны склад Прэзідыума Савета маладых спецыялістаў на бліжэйшыя два гады і яго старшыня. Узначаліла Савет старшы выкладчык кафедры перакладу і міжкультурнай камунікацыі Алена Антончык.

Дзейнасць Савета маладых спецыялістаў ГрДУ імя Янкі Купалы накіравана на дапамогу ў адаптацыі і замацаванні маладых спецыялістаў ва ўніверсітэце, садзейнічанне іх прафесійнаму і кар'ернаму росту за кошт забеспячэння ўдзелу ў справах універсітэта і грамадскага жыцця, прапаганду прынцыпаў карпаратыўнай культуры, дапамогу ў вырашэнні розных сацыяльных праблем.