Адно з першых мерапрыемстваў у рамках дзейнасці лабараторыі было прысвечана тэме знішчэння яўрэйскага насельніцтва нямецкімі акупантамі ў Гродне.
Удзельнікамі мерапрыемства сталі студэнты 1 і 2 курсаў спецыяльнасцяў «Гісторыя», «Сацыялогія», «Турызм і культурная спадчына», а таксама члены арганізаванай нядаўна на факультэце гісторыі, камунікацыі і турызму Студэнцкай навукова-даследчай лабараторыі па вывучэнні праблем Вялікай Айчыннай вайны пад кіраўніцтвам доктара гістарычных навук, прафесара Эдмунда Ярмусіка. На сустрэчу са студэнтамі быў запрошаны арганізатар і кіраўнік «Музея на Траецкай» Барыс Ерузалім. Барыс Яфімавіч шмат гадоў займаецца вывучэннем Халакоста на Гродзеншчыне, ім сабраны ўнікальны дакументальны матэрыял, які раскрывае гісторыю стварэння і ліквідацыі гета, падрыхтаваныя і выдадзеныя тры кнігі пра гэтыя трагічныя старонкі гісторыі.
Студэнты і ўдзельнікі мерапрыемства азнаёміліся з незвычайнай выставай, прысвечанай дзецям - вязням гета пад шакавальнай назвай «Лісты з пекла». І выстава, і створаны Барысам Ерузалімам дакументальны фільм «Боль памяці» - гэта апавяданне пра тое, як нямногім вязням, якія ўцяклі з гета, удавалася захаваць сваё жыццё, як дапамагалі ім у гэтым, рызыкуючы быць расстралянымі, мясцовыя жыхары. Удзельнікі сустрэчы не засталіся абыякавымі, задавалі Барысу Яфімавічу пытанні, якія тычацца захавання памяці пра гэты перыяд гісторыі.
Сустрэча з Барысам Ерузалімам стала адным з першых мерапрыемстваў, арганізаваных Студэнцкай навукова-даследчай лабараторыяй па вывучэнні праблем Вялікай Айчыннай вайны. Запланавана серыя сустрэч з цікавымі людзьмі, якія ў сваёй творчай, навуковай, мастацкай дзейнасці непасрэдна звяртаюцца да тэмы вайны, ствараюць унікальныя творы, адкрываючы невядомыя раней старонкі, падымаючы з нябыту імёны людзей, нярэдка незаслужана забытыя. Знаёмства з творчасцю такіх людзей заклікана дапамагчы ўдзельнікам лабараторыі вызначыць сферу сваіх інтарэсаў, напрамкі будучых навуковых даследаванняў.
Даведачна: 1 лістапада 2021 года спаўняецца 80 гадоў з таго дня, як у Гродна нямецкімі акупантамі былі створаны два габрэйскіх гета. З гэтага моманту пачалося планамернае татальнае знішчэнне яўрэйскага насельніцтва, якое з'явілася вынікам рэалізацыі нацысцкай палітыкі генацыду на акупаваных тэрыторыях.
