Канферэнцыя стала традыцыйнай навуковай падзеяй для Купалаўскага ўніверсітэта. У гэтым годзе яна сабрала 100 удзельнікаў з Беларусі, Расіі, Польшчы, Украіны, Літвы, Турцыі і Балгарыі.
Сувязь з калегамі-навукоўцамі купалаўцы трымалі ў асноўным у рэжыме онлайн, але частка ўдзельнікаў змагла прадставіць свае навуковыя распрацоўкі ў сценах Гродзенскага дзяржаўнага ўніверсітэта імя Янкі Купалы. Навукоўцы абмеркавалі актуальныя экалагічныя пытанні.
З году ў год праблемнае поле канферэнцыі змяняецца і пашыраецца. У гэтым годзе ўдзельнікі абмеркавалі пытанні забруджвання атмасферы і кліматычны менеджмент, ахову навакольнага свету, экалагічную біяхімію, фізіялогію і медыцыну. І гэта далёка не поўны спіс.
XVI міжнародная навукова-практычная канферэнцыя "Актуальныя праблемы экалогіі - 2021" праходзіць з 22 па 24 верасня. Яе арганізатарамі выступілі Гродзенскі дзяржаўны ўніверсітэт імя Янкі Купалы, Гродзенскі абласны камітэт прыродных рэсурсаў і аховы навакольнага асяроддзя і Універсітэт у Беластоку. Па выніках канферэнцыі плануецца выданне зборніка матэрыялаў з прысваеннем ISBN і рэгістрацыяй у РДНЦ.
