На дзённай бюджэтнай форме ў Купалаўскім універсітэце ў 2021/2022 навучальным годзе будуць навучацца 912 першакурснікаў: 472 дзяўчыны і 440 хлопцаў. 106 - скончылі школу з залатым ці срэбным медалём, а кожны 23-і першакурснік дзённай бюджэтнай формы навучання быў залічаны без уступных выпрабаванняў.

Найвышэйшы прахадны бал (354) сфарміраваўся на спецыяльнасць «Лінгвістычнае забеспячэнне міжкультурных камунікацый (міжнародны турызм)». На групу спецыяльнасцяў "Міжнароднае права", "Правазнаўства", «Эканамічнае права» прахадны бал склаў 329; на спецыяльнасць "Рамана-германская філалогія (нямецкая)" - 328; на спецыяльнасць «Кіраванне інфармацыйнымі рэсурсамі» - 322.

На завочнай бюджэтнай форме, у тым ліку дыстанцыйнай, будуць навучацца 211 першакурснікаў: 137 дзяўчат і 74 хлопца. 91,9% з іх скончылі каледжы. Пры гэтым 53 чалавекі маюць дыплом «з адзнакай». Стаж працы маюць 33,2% першакурснікаў завочнай бюджэтнай формы навучання.

На дзённай платнай форме будуць навучацца 719 першакурснікаў: 405 дзяўчат і 314 юнакоў. 26 скончылі школу з залатым або сярэбраным медалём.

На завочнай платнай форме навучацца ў ГрДУ імя Янкі Купалы будуць 406 першакурснікаў, з якіх 282 дзяўчыны і 124 хлопца. 12 першакурснікаў маюць дыплом з адзнакай.

Асаблівай папулярнасцю сярод абітурыентаў, якія паступілі на платную форму навучання, карысталіся спецыяльнасці "Выяўленчае мастацтва і кампутарная графіка", "Пачатковая адукацыя", "Фізічная культура" завочнай формы са скарочаным тэрмінам навучання.

Прыемна, што Купалаўская сям'я папоўнілася адным пераможцам заключнага этапу рэспубліканскай алімпіяды па вучэбных прадметах, васьмю пераможцамі трэцяга этапу рэспубліканскай алімпіяды. Пры гэтым 27 абітурыентаў залічаны для атрымання другой вышэйшай адукацыі.

Акрамя таго, у гэтым годзе ўпершыню ГрДУ імя Янкі Купалы абвясціў набор па спецыяльнасці "Электрычны і аўтаномны транспарт" і спецыяльнасці "Сацыяльная і псіхолага-педагагічная дапамога". У 2021 годзе выпускнікі, якія маюць сярэднюю спецыяльную адукацыю па спецыяльнасцях «Дашкольная адукацыя» і «Пачатковая адукацыя» са спецыялізацыяй "Лагапедыя" скарысталіся правам паступіць на спецыяльнасць «Лагапедыя» у завочнай скарочанай форме. Дарэчы, паступіць на навучанне на спецыяльнасць «Лагапедыя» у завочнай скарочанай форме абітурыенты 2021 года маглі толькі ў Купалаўскім універсітэце.