–Нішто так не аб'ядноўвае людзей, як сумесны занятак. А сумеснае навядзенне парадку і добраўпарадкаванне роднага інтэрната дапамагае яшчэ і ўсвядоміць цану працы рук чалавека і асцярожна ставіцца да вынікаў яго намаганняў, - сустрэўшы нас ля ўваходу ў інтэрнат, распавядае камандзір атрада, студэнтка 2 курса філалагічнага факультэта, Вольга Навіцкая.

На карысць альма-матэр студэнты працуюць з 5 ліпеня па 20 жніўня. Усяго ў складзе атрада - каманда з дзесяці чалавек - пяць хлопцаў і пяць дзяўчат. Працоўны тыдзень студбрыгады - пяцідзённы, з 8:30 да 17:00 з паўгадзінным перапынкам на абед. Рабяты фарбуюць сцены, падлогі, збіраюць новую мэблю, добраўпарадкоўваюць пакоі - увогуле, займаюцца падрыхтоўкай інтэрната да чарговага засялення студэнтаў-купалаўцаў.

- Для мяне праца ў будатрадзе - магчымасць ствараць будучыню сваімі рукамі, - дзеліцца Вольга Навіцкая. - Я набыла новы карысны вопыт. Да працы ў студбрыгадзе я не ведала, як разводзіць фарбу і як карыстацца валікам, а цяпер ужо магу для сябе, сваёй сям'і без праблем зрабіць рамонт у памяшканні.

Ксенія Барысевіч, студэнтка 2 курса факультэта фізічнай культуры, вырашыла на лета застацца ў Гродне і падзарабіць, а таму праца ў складзе студэнцкага атрада падалася для дзяўчыны вельмі прывабнай.

- Гэта вельмі добры варыянт зарабіць. Ды і чым дрэнна на лета застацца ў Гродне і жыць у інтэрнаце? - кажа Ксенія. - Працай мы не абдзелены. Хлопцы ў нашым атрадзе класныя, працоўныя будні праходзяць вельмі весела. Акрамя таго, за гэты час я шмат чаму навучылася: шпатляваць, тынкаваць, фарбаваць.

Другі год працуе ў будатрадзе студэнт 3 курса філалагічнага факультэта Андрэй Гедройть, які распавёў нам пра плюсы работы ў студбрыгадзе:

- Я вырашыў папрацаваць у складзе студатрада, каб павысіць свой рэйтынг і засяліцца ў інтэрнат у наступным навучальным годзе. У асноўным займаюся фарбавальнымі працамі, што мне вельмі падабаецца.

Па словах загадчыка інтэрнатам № 4 Арцёма Макарэвіча, студэнты ў студбрыгадзе матываваныя, бо яны не толькі заробяць грошай, але і атрымаюць гарантаванае месца ў інтэрнаце ў новым навучальным годзе.

- Асноўная задача будатрада - падрыхтаваць пакоі да рамонту падраднай арганізацыі, а затым навесці ў іх належны парадак. У гэтым годзе, як і ў двух папярэдніх, з дапамогай будатрада мы абнавілі 15 пакояў для пражывання студэнтаў, - адзначыў загадчык.

Даведка: інтэрнат № 4 калідорнага тыпу. Будынак складаецца з пяці жылых паверхаў. Усяго ў інтэрнаце 102 пакоі для пражывання. Для вольнага часу і самаразвіцця маюцца спартыўная зала, пакой самападрыхтоўкі, буфет. У інтэрнаце пражываюць беларускія і замежныя студэнты.