У парадзе-шэсці ўдзельнічаюць маладыя сем'і, у якіх ёсць дзеці да трох гадоў. Усе калыскі аформлены ў адпаведнасці з тэматыкай намінацый - «Люблю Беларусь», «Прафесіі», «Калыскі-казкі», «Жывы свет», «Інавацыйныя тэхналогіі». Як адзначаюць арганізатары свята, на самай справе, фантазія ўдзельнікаў практычна не абмежаваная. Да прыкладу, яны могуць ператварыць калыску ў сапраўдны казачны карабель, а свайго малога прадставіць у вобразе вядомага персанажа кнігі ці мультфільма.

Сям'я выпускніцы педагагічнага факультэта ГрДУ імя Янкі Купалы Марыі Юрчык удзельнічае ў парадзе ў намінацыі «Калыскі-казкі». У адпаведнасці з абранай тэматыкай Марыя і Вячаслаў не толькі аформілі дзіцячую калыску, але і ператварылі ў казачную гераіню сваю дачку Сафію.

Парад стартаваў з плошчы Савецкай, затым удзельнікі яркай калонай у суправаджэнні духавога аркестра, роставых лялек і казачных герояў прайшлі па вуліцах Савецкай і Ажэшкі ў парк імя Жылібера. У парку для ўдзельнікаў параду і гасцей свята арганізаваны інтэрактыўныя пляцоўкі, гульні, конкурсы, забавы ад аніматараў.