На працягу трох дзён 13 каманд з розных універсітэтаў краіны змагаліся за перамогу. У апошні дзень марафону, традыцыйна перад фінальнымі мерапрыемствамі на стадыёне, каманды прынялі ўдзел ва ўрачыстым мітынгу з ускладаннем кветак да помніка воінам-вызваліцелям горада Гродна ў парку імя Жылібера. Гэта даніна памяці героям Вялікай Айчыннай вайны. Затым калонай ўдзельнікі марафону адправіліся на стадыён Гродзенскага абласнога комплекснага цэнтра алімпійскага рэзерву, дзе адбыліся заключныя старты і цырымонія закрыцця.

- Грамадзянска-патрыятычны марафон «Разам - за моцную і квітнеючую Беларусь!» - гэта ініцыятыва студэнцкай моладзі ГрДУ імя Янкі Купалы, - падкрэсліў падчас урачыстай цырымоніі закрыцця старшыня Пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльным развіцці Віктар Лісковіч. - З часам марафон набыў статус рэспубліканскага і стаў галоўнай пляцоўкай для сустрэчы студэнтаў розных універсітэтаў краіны. Тут удзельнікі каманд не толькі спаборнічаюць, але і абменьваюцца думкамі і ўражаннямі. І гэта важна, паколькі такія мерапрыемствы аб'ядноўваюць маладых людзей.

Фінальныя мерапрыемствы марафону наведаў таксама памочнік Прэзідэнта Рэспублікі Беларусь - інспектар па Гродзенскай вобласці Юрый Караеў. Пры гэтым ён асабліва адзначыў, з якім азартам хлопцы спаборнічалі ў конкурсах.

- Я пабываў на некалькіх пляцоўках, на якіх праводзіліся конкурсы, і хацелася б звярнуць увагу на крэатыўнасць нашых студэнтаў, - падзяліўся Юрый Караеў. - Мне ўдалося крыху паразмаўляць з маладымі людзьмі. Я пытаўся ў іх пра тое, дзе яны вучацца, пра што мараць. І я застаўся пад добрым уражаннем ад хлопцаў. Відаць, што гэтыя маладыя людзі імкнуцца працаваць на карысць роднай краіны.

Пра важнасць грамадзянска-патрыятычнага выхавання казала падчас урачыстай цырымоніі закрыцця марафону і рэктар ГрДУ імя Янкі Купалы Ірына Кітурка. Яна адзначыла таксама, што ў самой назве марафону закладзены глыбокі сэнс.

- «Разам - за моцную і квітнеючую Беларусь!» - так называецца наш марафон. І гэта нагадвае нам пра тое, што ў гады Вялікай Айчыннай вайны нашы салдаты, прадстаўнікі розных народаў вялікай краіны, таксама разам ўсталі на абарону сваёй Радзімы, - акцэнтавала ўвагу Ірына Кітурка. - І, на мой погляд, у аснове грамадзянска-патрыятычнага выхавання ляжыць любоў, любоў да радзімы, сям'і, універсітэту. У Год народнага адзінства, у год 80-годдзя пачатку Вялікай Айчыннай вайны і ў год, калі Гродна з'яўляецца моладзевай сталіцай Беларусі, наш марафон аб'ядноўвае розныя ўніверсітэты, розныя вобласці і розных рабят.

Праграма фінальных мерапрыемстваў апынулася насычанай: шматлікія конкурсы праходзілі паралельна на розных пляцоўках ГрДУ імя Янкі Купалы. На базе ваеннага факультэта каманды спаборнічалі ў конкурсах ваенна-спартыўнага характару. Адразу ў некалькіх навучальных карпусах універсітэта ўдзельнікі марафону пяклі хлеб, майстравалі шпакоўні, а таксама спявалі і танчылі. Былі прадугледжаны і інтэлектуальныя гульні, і спаборніцтвы ў прамоўніцкім майстэрстве ў рамках дэбатаў. Па выніках кожнага з конкурсаў каманды набіралі балы, якія іх набліжалі да запаветнай мэты - перамогі ў марафоне.

- Мы добра правялі час. Гэтыя тры дні былі поўныя новымі ўражаннямі, эмоцыямі, мы пасябравалі са студэнтамі іншых універсітэтаў. Усё было проста супер! - распавёў удзельнік каманды Беларускага дзяржаўнага ўніверсітэта Яўген Адамовіч падчас заключных стартаў марафона, якія праходзілі на цэнтральным стадыёне Гродна.

Сваімі ўражаннямі ад удзелу ў конкурсах ахвотна падзяліліся таксама і студэнты з Віцебска. Так, Уладзіслаў Мірончык, студэнт Віцебскага дзяржаўнага тэхналагічнага ўніверсітэта, распавёў пра тое, як старанна рыхтавалася іх каманда да фінальных выпрабаванняў.

- На працягу двух месяцаў мы прыдумлялі творчыя нумары, рыхтавалі візітоўкі, рэпеціравалі і трэніраваліся. У Гродне мы прыехалі, каб перамагчы, - падкрэсліў Уладзіслаў Мірончык. - І гэты горад прыняў нас неверагодна цёпла, хоць, кажучы гэта, я не маю на ўвазе надвор'е. Нам крыху не хапіла майскага сонейка. Але за гэтыя некалькі дзён, што мы праходзілі выпрабаванні, наша каманда згуртавалася. Мы таксама пасябравалі з камандамі іншых універсітэтаў.

Падчас цырымоніі закрыцця марафону былі названыя пераможцы ў асобных намінацыях і ўладальнікі галоўных узнагарод. У намінацыі «У абарону жыцця, маральнасці і сямейных каштоўнасцяў» перамаглі каманды Гродзенскага дзяржаўнага універсітэта імя Янкі Купалы і Гродзенскага дзяржаўнага медыцынскага ўніверсітэта. У намінацыі «Знаўцы роднай зямлі» перамога была прысуджана камандам Брэсцкага дзяржаўнага ўніверсітэта імя А. С. Пушкіна і Беларускага дзяржаўнага ўніверсітэта інфарматыкі і радыёэлектронікі. У намінацыі «Моладзь. Ініцыятыва. Будучыня» дыплом пераможцы быў уручаны прадстаўнікам каманды Купалаўскага ўніверсітэта. І ў намінацыі «Да абароны Айчыны гатовы» перамогу падзялілі каманды Гродзенскага дзяржаўнага ўніверсітэта імя Янкі Купалы і Беларуска-Расійскага ўніверсітэта.

Па выніках фіналу IV Рэспубліканскага грамадзянска-патрыятычнага марафона «Разам - за моцную і квітнеючую Беларусь!» першае месца заняла каманда Віцебскага дзяржаўнага тэхналагічнага ўніверсітэта. Другое месца - у каманды Беларуска-Расійскага ўніверсітэта. Трэцяе месца падзялілі каманды Беларускага дзяржаўнага ўніверсітэта інфарматыкі і радыёэлектронікі і Гродзенскага дзяржаўнага медыцынскага ўніверсітэта. Уладальнікам Гран-пры стаў Гродзенскі дзяржаўны ўніверсітэт імя Янкі Купалы.

.