III Рэспубліканскі маладзёжны фестываль-конкурс «Медыясфера-2021» праходзіць у рамках цыклу мерапрыемстваў «Гродна - моладзевая сталіца» і прымеркаваны да Года народнага адзінства. У гэтым годзе на конкурс было пададзена больш за 300 праектаў у сферы медыя, аўтарамі якіх сталі студэнты вышэйшых устаноў адукацыі, навучэнцы каледжаў і школ. Журы вызначыла больш за 100 фіналістаў, якія былі запрошаныя на двухдзённы фестываль «Медыясфера-2021» у Гродзенскі дзяржаўны ўніверсітэт імя Янкі Купалы.

- Важнай адметнай асаблівасцю фестывалю з'яўляецца рэкордная колькасць удзельнікаў. Мы пастараліся падрыхтаваць для рабят насычаную праграму і запрасілі для правядзення майстар-класаў не толькі прафесіяналаў з рэгіянальных СМІ, але і калег з Мінска, - адзначыла загадчык кафедры журналістыкі ГрДУ імя Янкі Купалы Іна Мінчук. - Па ацэнцы журы, узровень работ удзельнікаў «Медыясферы» з кожным годам становіцца ўсё вышэй. Магчыма, гэта звязана з тым, што некаторых рабят ужо можна назваць пастаяннымі ўдзельнікамі фестывалю, яны кожны год прыязджаюць да нас, вучацца, чуюць рэкамендацыі спікераў на майстар-класах і спрабуюць палепшыць свае праекты.

Алена Юхно, студэнтка Віцебскага дзяржаўнага ўніверсітэта імя П. М. Машэрава, - адна з такіх пастаянных удзельніц фестывалю. У гэтым годзе яна ў складзе каманды аўтараў прадстаўляе на конкурсе студэнцкі інтэрнэт-часопіс «VSUONLINE».

- Гэта інтэрнэт-праект, у рамках якога мы расказваем аб жыцці студэнтаў, выкладчыкаў і супрацоўнікаў універсітэта, - падзялілася Алена Юхно. - Гэты праект аб'яднаў студэнтаў розных факультэтаў: над стварэннем інтэрнэт-часопіса працуюць мастакі, дызайнеры, журналісты, матэматыкі-праграмісты, якія дапамагалі нам у напісанні платформы для гэтага праекта. Аўтарам артыкулаў можа стаць і выкладчык, і студэнт. У выніку атрымліваецца сапраўды аб'ядноўваючы праект для ўсяго ўніверсітэта.

Студэнтка з Віцебска таксама адзначыла, што «Медыясфера» - унікальны фестываль і выдатная пляцоўка для пачаткоўцаў журналістаў.

- Для студэнтаў і тых, хто толькі робіць першыя крокі ў сферы медыя, у нас не так шмат конкурсаў, у якіх можна паўдзельнічаць, чамусьці павучыцца і паказаць сябе. І «Медыясфера» з'яўляецца адным з такіх конкурсаў. Менавіта таму мы стараемся ўдзельнічаць у гэтым фэсце кожны год, каб атрымаць новыя веды, а затым прымяніць іх на практыцы, стварыць новы праект, каб прадставіць яго ўжо на наступным конкурсе, - распавяла Алена Юхно.

Праекты, якія, на думку журы, прызнаныя лепшымі ў гэтым годзе, былі названыя ў завяршэнне другога фестывальнага дня. Падчас цырымоніі ўзнагароджання да ўдзельнікаў і гасцей маладзёжнага фестывалю-конкурсу «Медыясфера-2021» звярнуўся з прывітальным словам прарэктар па выхаваўчай працы ГрДУ імя Янкі Купалы Васілій Сянько. Затым былі агучаныя імёны лаўрэатаў і ўладальнікаў спецыяльных дыпломаў. Пераможцы былі вызначаныя ў катэгорыях «Профі» і «Юніёры» у 6 намінацыях: «Друкаванае СМІ», «Электроннае СМІ (ТБ), «Электроннае СМІ (радыё)», «Фотапраект», «Інтэрнэт-праект», «Камунікацыйны праект» .

Цікава, што ў гэтым годзе больш за ўсё праектаў і юніёры, і профі даслалі для ўдзелу ў намінацыі «Інтэрнэт-праект». Гэта і акаўнты ў сацыяльных сетках, і каналы ў мессенджерах, і ютуб-каналы ўстаноў адукацыі, і іншыя інтэрнэт-праекты. Як адзначаюць арганізатары, відавочна, што студэнты і навучэнцы актыўна асвойваюць інтэрнэт-камунікацыю, і гэта адбіваецца ў заяўках, якія яны дасылаюць на фестываль.

Дарэчы, першы фестываль «Медыясфера» адбыўся ў Купалаўскім універсітэце ў 2010 годзе. Тады гэта быў фестываль відэапраектаў, і ў ім прымалі ўдзел толькі студэнты ГрДУ імя Янкі Купалы. У 2019 годзе фэстываль упершыню прайшоў у статусе рэспубліканскага. Маладзёжны фестываль-конкурс «Медыясфера» праводзіць кафедра журналістыкі факультэта гісторыі, камунікацыі і турызму Гродзенскага дзяржаўнага ўніверсітэта імя Янкі Купалы пры падтрымцы Міністэрства інфармацыі Рэспублікі Беларусь і галоўнага ўпраўлення ідэалагічнай работы і па справах моладзі Гродзенскага абласнога выканаўчага камітэта.