Купалаўцы перадалі навучэнцам дапаможнай школы №1 г. Гродна спартыўны інвентар, цацкі, канцылярскія тавары, прысмакі і садавіну. Навагоднія падарункі для дзяцей з асаблівасцямі псіха-фізічнага развіцця былі набыты за кошт сродкаў, сабраных на дабрачынным кірмашы, якая нядаўна прайшла на факультэце эканомікі і кіравання.

Актывісткі «Беларускага саюза жанчын» Купалаўскага ўніверсітэта разам з прадстаўнікамі валанцёрскага атрада факультэта эканомікі і кіравання «Надзея» падрыхтавалі для дзяцей сапраўднае свята. Выхаванцы спецыялізаванай установы былі рады сустрэчы з Дзедам Марозам і Снягуркай. Мерапрыемства прайшло ў цёплай і сяброўскай атмасферы.

- Прыемна дарыць дзецям радасць напярэдадні самага чароўнага свята ў годзе. Гэтае мерапрыемства - адно з серыі дабрачынных акцый, якія будуць рэалізаваны купалаўцамі, валанцёрамі нашага факультэта напярэдадні Новага года, - распавяла старшыня першаснай арганізацыі ГА «Беларускі саюз жанчын» ГрДУ імя Янкі Купалы, дэкан факультэта эканомікі і кіравання Марына Карпіцкая.

У рамках рэспубліканскай дабрачыннай акцыі «Нашы дзеці» прадстаўнікі ўсіх факультэтаў Купалаўскага ўніверсітэта праводзяць святочныя мерапрыемствы, тэматычныя выставы, а таксама арганізуюць майстар-класы па стварэнні навагодніх цацак. Асаблівую ўвагу купалаўцы імкнуцца надаць сем'ям, якія апынуліся ў складанай жыццёвай сітуацыі, выхаванцам дзіцячых спецыялізаваных устаноў і школ-інтэрнатаў, а таксама дзецям са шматдзетных, апякунскіх, прыёмных сем'яў. Марафон добрых спраў будзе доўжыцца на працягу ўсяго перыяду навагодніх святаў, да 10 студзеня.