Перад сустрэчай з рэзідэнтамі Навукова-тэхналагічнага парку ГрДУ імя Янкі Купалы старшыня Дзяржаўнага камітэта па навуцы і тэхналогіях Аляксандр Шумілін азнаёміўся з ходам будаўніцтва другой чаргі Тэхнапарка. Новы будынак плануецца ўвесці ў строй вясной будучага года, зараз правядзенне будаўнічых работ знаходзіцца на завяршальным этапе.

- Такія пляцоўкі, як тэхнапарк, закліканы дапамагчы, перш за ўсё, маладым людзям, таленавітым і прагматычным, увасобіць сваю бізнэс-ідэю ў пэўны ўзор, а бізнэс-план - у тэхналогію, - адзначыў у час наведвання Навукова-тэхналагічнага парку Купалаўскага ўніверсітэта Аляксандр Шумілін . - Рынак дыктуе ўмовы і важна разумець, што сёння ўсе хочуць спачатку бачыць ўзор, бачыць, як гэта працуе. Стварыць такі дасведчаны ўзор і дапамагаюць тэхнапаркі. Затым, калі прапанаваны тавар альбо тэхналогія будуць запатрабаваныя на рынку, можна разлічваць на інвестыцыі для бізнесу. Будаўніцтва навукова-тэхналагічных паркаў выгадна ўсім: краіна атрымлівае новыя вытворчасці, а людзі - добры заробак і магчымасці самарэалізацыі.

Навукова-тэхналагічны парк Купалаўскага ўніверсітэта быў адкрыты два гады таму. Зараз там працуюць ужо 13 кампаній-рэзідэнтаў, сярод якіх нямала студэнтаў ГрДУ імя Янкі Купалы.

- Толькі ў гэтым годзе 3 студэнты адкрылі свае інавацыйныя прадпрыемствы ў Навукова-тэхналагічным парку, - распавяла рэктар ГрДУ імя Янкі Купалы Ірына Кітурка. - Але Тэхнапарк патрабуе развіцця, паколькі ў дзеючым будынку няма вытворчых плошчаў. Яны з'явяцца з уводам у эксплуатацыю другой чаргі. Акрамя таго, у новым будынку акрамя плошчаў для рэзідэнтаў прадугледжана такая пляцоўка, як выставачны цэнтр. Гэта добрая магчымасць для прадпрыемстваў горада і вобласці заявіць пра сябе.

Аб камерцыялізацыі бізнес-ідэй, імпартазамяшчэнні і стратэгіі інавацыйнага развіцця рэспублікі ішла размова і падчас сустрэчы Аляксандра Шуміліна з рэзідэнтамі Навукова-тэхналагічнага парку. Рэзідэнтаў цікавілі пытанні аб магчымым пашырэнні прэферэнцый і аказанні дапамогі ў прасоўванні бізнес-ідэй. Як было адзначана, цяпер разглядаецца пытанне аб павелічэнні колькасці льгот, на якія могуць разлічваць рэзідэнты тэхнапаркаў. Прынята таксама рашэнне, каб палова ад тых паступленняў у бюджэт, якія ідуць ад падаткаў рэзідэнтаў, заставаліся ў тэхнапарку ў выглядзе фонду на развіццё.

Размова пра важнасць развіцця інавацыйнага прадпрымальніцтва была працягнута ў сценах Гродзенскага дзяржаўнага ўніверсітэта імя Янкі Купалы ў час сустрэчы Аляксандра Шуміліна з маладымі навукоўцамі. Старшыня Дзяржаўнага камітэта па навуцы і тэхналогіях Рэспублікі Беларусь нагадаў, што ў краіне рэалізуецца праект «Універсітэт 3.0», да якога ў ліку першых далучыўся і ГрДУ імя Янкі Купалы.

- Гэта значыць, што мы ўдзяляем увагу не толькі пытанням падрыхтоўкі кадраў, развіцця навукі, але і камерцыялізацыі навукова-тэхнічных распрацовак, - растлумачыў Аляксандр Шумілін. - Напэўна, сёння ёсць пэўны прабел у бізнес-адукацыі. Але ж моладзь у нас таленавітая, у яе шмат добрых задумак, і гэта трэба максімальна выкарыстаць.

На сустрэчы з маладымі навукоўцамі абмяркоўваліся перспектывы развіцця фундаментальнай навукі і прыкладных даследаванняў, актывізацыі супрацоўніцтва ў галіне навуковых распрацовак паміж універсітэтамі і пытанні фінансавання навуковых лабараторый. Закранулі таксама і актуальныя аспекты трансфармацыі адукацыйнага працэсу ў сучасным свеце. Дыялог доўжыўся каля дзвюх гадзін, маладыя навукоўцы атрымалі адказы на шматлікія свае пытанні і адзначылі важнасць падобных сустрэч для выпрацоўкі канструктыўных рашэнняў у адказ на ўсё новыя задачы, якія пастаянна ўзнікаюць у сучасным свеце перад навуковай супольнасцю.