У каманды прафесіяналаў ТАА «Усё ўлічым», у складзе якой - бухгалтар, маркетолаг і медыятар, ужо ёсць першыя заказчыкі.

- Цяпер мы працуем над замовай ў сферы бухгалтарскага ўліку, - распавёў кіраўнік кампаніі-рэзідэнта Уладзіслаў Банцэвіч. - Сярод нашых першых кліентаў ёсць адна досыць буйная кампанія і некалькі індывідуальных прадпрымальнікаў. Мы прапануем розныя паслугі - гэта і медыятарства, і дапамога ў арганізацыі канферэнцый, вядзенні бухгалтэрыі. Акрамя таго, мы дапамагаем прадстаўнікам бізнесу ў прасоўванні і раскрутцы іх тавараў і паслуг.

Уладзіслаў Банцэвіч, студэнт 4 курса факультэта эканомікі і кіравання, пастаянны ўдзельнік конкурсаў "ИнНаСтарт" і "InvestWeekend", стаў заснавальнікам трынаццатай кампаніі-рэзідэнта Тэхнапарка ГрДУ імя Янкі Купалы. На дадзены момант амаль палова ўсіх кампаній-рэзідэнтаў Навукова-тэхналагічнага парку адкрыта студэнтамі-купалаўцамі.

Дарэчы, рэзідэнты Тэхнапарка могуць разлічваць на шэраг прэферэнцый, якія спрыяюць хуткаму развіццю бізнесу. У прыватнасці, для рэзідэнтаў прадугледжаны льготы пры аплаце арэнды высакаякаснага абсталявання, офісаў і вытворчых плошчаў. Акрамя таго, для іх даступная кваліфікаваная дапамога і кансультацыі спецыялістаў у пошуках аптымальных шляхоў рэалізацыі інавацыйных ідэй.