У гэтым месяцы тэматычныя акцыі, прымеркаваныя да Сусветнага дня дабрыні і Міжнароднага дня талерантнасці, адбудуцца на юрыдычным і педагагічным факультэтах. На снежань 2020 года актывам факультэта біялогіі і экалогіі запланавана правядзенне акцыі «Стоп ВІЧ / СНІД». Традыцыйна ў снежні - студзені валанцёры Купалаўскага ўніверсітэта, супрацоўнікі і студэнты ўсіх факультэтаў далучацца да рэспубліканскай дабрачыннай навагодняй акцыі «Нашы дзеці».

На працягу ўсяго навучальнага года ў рамках праекта «Дары сябе без астатку» будзе аказвацца дапамога ветэранам Вялікай Айчыннай вайны, ветэранам працы ўніверсітэта, адзінокім пажылым людзям. Валанцёры будуць ажыццяўляць догляд за месцамі памяці, а таксама ініцыяваць акцыі па навядзенні парадку ў горадзе і вобласці. Запланавана і правядзенне навучальных трэнінгаў для членаў валанцёрскага цэнтра ўніверсітэта, накіраваных на фарміраванне і развіццё кампетэнцый, неабходных для паспяховай валанцёрскай дзейнасці.

Праект «Дары сябе без астатку» рэалізуецца ў ГрДУ імя Янкі Купалы з 2016 года з мэтай каардынацыі і актывізацыі моладзевых ініцыятываў, выхавання ў студэнтаў высокіх маральных якасцяў шляхам прыцягнення маладых людзей да вырашэння сацыяльна значных праблем. Сярод асноўных напрамкаў праекта - дапамога ветэранам, адзінокім пажылым людзям, людзям з абмежаванымі магчымасцямі, дзецям-сіротам і дзецям, якія засталіся без апекі бацькоў, а таксама дапамога бяздомным жывёлам, ахова навакольнага асяроддзя і папулярызацыя здаровага ладу жыцця. Праект «Дары сябе без астатку» рэалізуецца Саветам валанцёраў Купалаўскага ўніверсітэта.