У гэтым годзе на розных аб'ектах Рэспублікі Беларусь працавалі каля 500 студэнтаў-купалаўцаў ў складзе 30 студэнцкіх атрадаў. Ва ўрачыстай цырымоніі закрыцця Трэцяга працоўнага семестра-2020, якая па традыцыі адбылася на Плошчы ўніверсітэцкага сцяга, прынялі ўдзел прадстаўнікі зводнага студэнцкага атрада ГрДУ імя Янкі Купалы.

- Наш універсітэт робіць усё для захавання традыцый студатрадаўскага руху, - адзначыў у сваім ўступным слове прарэктар па выхаваўчай працы Васіль Сянько. - У летні перыяд студэнцкія атрады Купалаўскага ўніверсітэта занятыя, фактычна, ва ўсіх галінах эканомікі і сацыяльнай сферы Рэспублікі Беларусь.

У Гродзенскім дзяржаўным універсітэце імя Янкі Купалы былі арганізаваны педагагічныя, будаўнічыя, сэрвісныя студэнцкія атрады. Рабяты працавалі не толькі на аб'ектах нашай вобласці, але і на прадпрыемствах рэспублікі.

- На жаль, эпідэміялагічная сітуацыя ў гэтым годзе не дазволіла нам накіраваць атрады ў Расію і Малдову. Аднак нашы студэнты ў складзе 15 студэнцкіх атрадаў працавалі выхавацелямі ў дзіцячых аздараўленчых лагерах на працягу ўсяго лета, - распавяла начальнік упраўлення выхаваўчай работы з моладдзю ГрДУ імя Янкі Купалы Аксана Котава. - Будатрад Купалаўскага ўніверсітэта традыцыйна працаваў і на БелАЭС ў Астраўцы. Акрамя таго, у гэтым годзе ў Гродзенскай вобласці моладзь працавала на будаўнічай пляцоўцы анкалагічнага дыспансера. Купалаўцы змаглі паўдзельнічаць таксама ў рэспубліканскім працоўным праекце «Атлант-2020».

Гэтым летам рабяты актыўна працавалі і на аб'ектах Купалаўскага ўніверсітэта. Будатрадаўцы дапамагалі рыхтаваць студэнцкія інтэрнаты і навучальныя карпусы ГрДУ імя Янкі Купалы да новага навучальнага года. У правядзенні рамонтных работ на гэтых аб'ектах было задзейнічана 9 студэнцкіх атрадаў. Дапамагалі студэнты-купалаўцы і ва ўладкаванні новага інтэрната.

- Я ў гэтым годзе ўпершыню далучыўся да будатрадаўскага руху, быў прызначаны камандзірам атрада і разам з іншымі рабятамі прымаў удзел у правядзенні рамонтных работ у тым інтэрнаце, дзе я жыву, - падзяліўся студэнт 3 курса факультэта мастацтваў і дызайну Уладзіслаў Карнееў. - Мы фарбавалі, шпатлявалі і нават тынкавалі. Усе працы ажыццяўлялі пад наглядам кіраўніцтва інтэрната і будаўнікоў, якія працавалі разам з намі. І хоць мая будучая спецыяльнасць ніяк не звязаная з будаўнічай сферай, упэўнены, што гэты вопыт мне спатрэбіцца ў жыцці.

Падчас цырымоніі ўрачыстага закрыцця Трэцяга працоўнага семестра-2020 тыя, хто працаваў найбольш старанна, былі ўзнагароджаны лістамі падзякі. Заслужаныя ўзнагароды рабятам уручыла камандзір Штаба студэнцкіх атрадаў Гродзенскага гарадскога камітэта ГА «БРСМ» Ганна Кісялеўская. Прарэктар па выхаваўчай працы Васілій Сянько ўручыў дыпломы лепшым штабам працоўных спраў на факультэтах Купалаўскага ўніверсітэта. У гэтым годзе лепшымі былі прызнаныя Штабы інжынерна-будаўнічага факультэта, факультэта мастацтваў і дызайну, а таксама педагагічнага факультэта.

Лісты падзякі былі ўручаны і прадстаўнікам арганізацый, якія актыўна супрацоўнічаюць з універсітэтам і дапамагаюць у працаўладкаванні студэнтаў у летні перыяд. Сярод узнагароджаных - намеснік генеральнага дырэктара па ідэалагічнай працы, кадрах і сацыяльных пытаннях ААТ «Гроднапрамбуд» Аляксей Равяка, дырэктар дзіцячага аздараўленчага лагера "Сузор'е" Ганна Кіўляк, і. а. начальніка аддзела эксплуатацыі будынкаў і збудаванняў адміністрацыйна-гаспадарчага кіравання Георгій Гец, загадчык кафедры сучасных тэхналогій даўніверсітэцкай адукацыі ГрДУ імя Янкі Купалы Ірына Карлюкова.

Напрыканцы мерапрыемства ад імя ўдзельнікаў будатрадаўскага руху сваімі ўражаннямі аб працоўным летнім сезоне-2020 падзялілася камандзір абласной будоўлі будаўнічага атрада «Метэор-1», студэнтка 4 курса інжынерна-будаўнічага факультэта Валерыя Рудаміна. Яна адзначыла, што гэта быў добры прафесійны і жыццёвы вопыт, а таксама выдатная магчымасць набыць новых сяброў.