Дакумент аб стварэнні новай кампаніі-рэзідэнта быў падпісаны дырэктарам Навукова-тэхналагічнага парку ГрДУ імя Янкі Купалы Аляксандрам Васілевічам і індывідуальным прадпрымальнікам Аляксеем Дзяшко. Аляксей - студэнт 3 курса факультэта матэматыкі і інфарматыкі спецыяльнасці "Камп'ютарная бяспека" (матэматычныя метады і праграмныя сістэмы). Дзейнасць рэзідэнта збольшага звязана з яго спецыяльнасцю - гэта новая галіна ў IT, якая толькі набірае абароты. На базе Тэхнапарка ўніверсітэта купалавец будзе займацца тэставаннем сістэм пранікнення.

- Розныя кампаніі змогуць звяртацца да нас, каб пратэставаць свае інтэрнэт-сайты або сервера на нейкія ўразлівасці, - тлумачыць Аляксей Дзяшко. - Гэта могуць быць пэўныя пагрозы бяспекі, а таксама недапрацоўкі вэб-рэсурсу, якія маглі не ўлічыць распрацоўшчыкі пры іх стварэнні.

Аляксей Дзяшко вырашыў у першую чаргу звярнуць увагу на тыя магчымасці, якія прапануе для далейшага прафесійнага росту яго Alma Mater - менавіта па гэтай прычыне ён абраў Навукова-тэхналагічны парк універсітэта. Купалавец прызнаецца, што Тэхнапарк падтрымлівае бізнесменаў на пачатковым этапе і стварае добрыя ўмовы для пачатку іх прадпрымальніцкай дзейнасці.