Адміністратары Нацыянальнага офіса праграмы Erasmus + Аляксандр Рытаў і Ірына Лабкова падчас сустрэчы з прарэктарам па вучэбнай працы ГрДУ імя Янкі Купалы Юрыем Белых, загадчыкам сектара міжнароднай праектнай дзейнасці Алесяй Бялко і спецыялістам аддзела міжнародных праектаў і акадэмічнай мабільнасці Надзеяй Кур'ян абмеркавалі актуальныя пытанні, якія датычацца арганізацыі акадэмічнай мабільнасці студэнтаў і выкладчыкаў універсітэта. Аляксандр Рытаў і Ірына Лабкова станоўча ацанілі вопыт купалаўцаў і далі некаторыя карысныя рэкамендацыі, як палепшыць працу па рэалізацыі праграмы Erasmus +.

Прадстаўнікі Нацыянальнага офіса праграмы Erasmus + таксама сустрэліся са студэнтамі і супрацоўнікамі Купалаўскага ўніверсітэта, якія прымалі ўдзел у акадэмічнай мабільнасці. Затым адбылося абмеркаванне планаў на новы перыяд рэалізацыі праграмы Erasmus +.

Акадэмічная мабільнасць ў рамках праграмы Erasmus + у нашым універсітэце ажыццяўляецца з 2015 года. За гэты час больш за 140 супрацоўнікаў універсітэта і больш за 100 студэнтаў сталі ўдзельнікамі акадэмічнай мабільнасці. Па праграме Erasmus + Гродзенскім дзяржаўным універсітэтам імя Янкі Купалы рэалізуецца супрацоўніцтва з 18 краінамі-партнёрамі, сярод якіх Іспанія, Італія, Польшча, Літва, Вялікабрытанія і іншыя, заключана 58 міжвузаўскіх пагадненняў з універсітэтамі гэтых краін.

Выкладчыкі ГрДУ імя Янкі Купалы маюць магчымасць праходзіць стажыроўку ў еўрапейскіх універсітэтах, чытаць лекцыі, а студэнты - вучыцца па абмене. За пяць гадоў дзеяння праграмы Erasmus + Купалаўскі ўніверсітэт таксама наведалі больш за 70 выкладчыкаў еўрапейскіх ВНУ. ГрДУ імя Янкі Купалы прымаў студэнтаў па абмене з Польшчы, Літвы і Іспаніі. Чакаецца, што ў новым навучальным годзе да нас прыедуць студэнты з Польшчы і Іспаніі.