У 2019 годдз ў конкурсе прынялі ўдзел 14 студэнтаў і магістрантаў з 4 устаноў вышэйшай адукацыі.

Пераможцам конкурсу ў намінацыі «Лепшая дыпломная работа ў галіне кантролю якасці» стала дыпломная праца студэнткі 4 курса фізіка-тэхнічнага факультэта Кізевіч Алены. Праца прысвечана мадэляванню эталонаў масы і ацэньвання іх характарыстык. Навуковы кіраўнік студэнткі - дацэнт кафедры агульнай фізікі, кандыдат фізіка-матэматычных навук, дацэнт Генадзь Васілюк.

Праца магістранткі факультэта біялогіі і экалогіі Лічык Святланы прызнана лепшай у намінацыі «Лепшая навукова-даследчая работа ў галіне кантролю якасці». Праца Святланы Лічык прысвечана ацэнцы эфектыўнасці антымікробнага дзеяння прэпаратаў на аснове полігексамеціленгуанідзіна гідрахларыда ў некаторых абласцях народнай гаспадаркі Беларусі. Навуковы кіраўнік Святланы - загадчык кафедры экалогіі факультэта біялогіі і экалогіі, кандыдат біялагічных навук, дацэнт Галіна Юхневіч.

Экспертная камісія, у якую ўвайшлі прадстаўнікі Дзяржстандарту, Міністэрства адукацыі, іншых рэспубліканскіх органаў дзяржкіравання і вядучыя спецыялісты ў галіне менеджменту і кантролю якасці, ацэньвала актуальнасць тэм прадстаўленых работ, метадалогію і метады даследаванняў, іх змест і глыбіню, навуковую навізну і значнасць атрыманых вынікаў, іх апрабацыю.

У тэму

Конкурс «Лепшая дыпломная і навукова-даследчая работа студэнтаў у галіне менеджменту і кантролю якасці» праводзіцца ў адпаведнасці з пастановай Дзяржстандарту Рэспублікі Беларусь ад 30.12.2005 № 62 штогод, пачынаючы з 2007 года. Сярод мэтаў конкурсу - павышэнне ўзроўню падрыхтоўкі спецыялістаў у галіне менеджменту і кантролю якасці, ацэнка ўзроўню правядзення навукова-даследчай работы ў галіне менеджменту і кантролю якасці, стымуляванне адукацыйнай, навуковай і прыкладной дзейнасці ў галіне менеджменту і кантролю якасці, папулярызацыя перадавога вопыту ў галіне менеджменту і кантролю якасці, падтрымка таленавітых студэнтаў і магістрантаў, матывацыя навуковых кіраўнікоў дыпломных і навукова-даследчых работ.

Конкурс праводзіцца ў намінацыях «Лепшая дыпломная работа ў галіне менеджменту якасці», «Лепшая дыпломная работа ў галіне кантролю якасці», «Лепшая навукова-даследчая работа ў галіне менеджменту якасці», «Лепшая навукова-даследчая работа ў галіне кантролю якасці».