Удзельнікамі мерапрыемства, якое прайшло напярэдадні Дня Вялікай Перамогі, сталі прадстаўнікі першаснай арганізацыі ГА "Беларускі саюз жанчын" Купалаўскага ўніверсітэта. Рукатворную кнігу ў фонд музея ва ўрачыстай абстаноўцы перадалі студэнткі факультэта эканомікі і кіравання Вікторыя Маленчык і Наталля Рагімава.

Кніга «Жывем! Помнім! Ганарымся!», падрыхтаваная сіламі Саюза жанчын ГрДУ імя Янкі Купалы, атрымала званне лаўрэата рэспубліканскага конкурсу патрыятычных праектаў. У яе ўвайшлі лепшыя малюнкі аб Вялікай Айчыннай вайне і эсэ «Ліст салдату», падрыхтаваныя вучнямі, студэнтамі ўніверсітэта і іншых устаноў адукацыі Гродна. У сваіх працах аўтары пранікнёна падзяліліся пачуццямі, перажываннямі, адрасуючы іх невядомым салдатам на фронт, а таксама выказалі ім падтрымку і падзяку за праяўленую мужнасць і адвагу. У кнізе размясцілі і эсэ, прысвечанае ветэрану Вялікай Айчыннай вайны Надзеі Юльянаўне Петрыга, шэфства над якой ажыццяўляюць валанцёры саюза жанчын ГрДУ імя Янкі Купалы. Дарэчы, у пачатку жніўня гэтага года Надзея Петрыга адзначыць свой 99-гадовы Дзень нараджэння.

Ад асобы Беларускага саюза жанчын і ўсяго Купалаўскага ўніверсітэта цёплыя віншаванні з 75-гадовай гадавінай Перамогі былі адрасаваныя ветэранам, арганізатарам, а таксама гасцям мерапрыемства. Ваенны камісар Гродзенскай вобласці, палкоўнік Вячаслаў Раманенка выказаў словы падзякі старшыні ГА «БСЖ», дэкану факультэта эканомікі і кіравання Марыне Карпіцкай і ўсім членам Саюза жанчын ГрДУ імя Янкі Купалы за дапамогу ў правядзенні патрыятычных і валанцёрскіх мерапрыемстваў. Ён таксама адзначыў, што кніга зойме пачэснае месца ў музеі камісарыята і будзе дэманстравацца пры правядзенні прызыўной кампаніі і правядзенні прысягі салдатамі і курсантамі на вернасць Радзіме.