Універсітэцкая акцыя, прысвечаная 75-годдзю Вялікай Перамогі, праходзіць пад назвай «Купалаўцы памятаюць». Праект рэалізуецца Цэнтрам студэнцкіх ініцыятыў сумесна з Музеем гісторыі развіцця ГрДУ імя Янкі Купалы.

Супрацоўнікі і студэнты Купалаўскага ўніверсітэта, якія прынялі ўдзел у акцыі, распавялі перад відэакамерай аб незабыўных падзеях з жыцця сваіх сваякоў, лёс якіх быў так ці інакш звязаны з вайной. Яны мужна змагаліся з ворагам на перадавой, вялі падпольную дзейнасць, здзяйснялі подзвігі, дапамагаючы тым, хто заставаўся на акупаванай нямецка-фашысцкімі захопнікамі тэрыторыі. Кожная з гісторый унікальная, а ўспаміны перадаюцца з пакалення ў пакаленне. Купалаўцы памятаюць пра подзвігі сваіх герояў!

Відэаролік з апавяданнямі студэнтаў і супрацоўнікаў ГрДУ імя Янкі Купалы пра сваіх сваякоў - удзельніках Вялікай Айчыннай вайны - гэта яшчэ адна спроба ўвекавечыць памяць пра герояў таго нялёгкага часу. Акцыя «Купалаўцы памятаюць» праводзіцца з мэтай захавання ў кожнай сям'і асабістай памяці пра вайну, пра доблесці народа, асэнсавання гераічнага вопыту продкаў і аднаўлення пераемнасці пакаленняў.