Удзельнікі сустрэчы абмеркавалі асноўныя палажэнні бюджэту 2020 года, якія тычацца рэалізацыі сацыяльнай палітыкі. Як было адзначана, запланавана ўзмацненне сацыяльнай арыентаванасці расходаў і канцэнтрацыя бюджэтных сродкаў на прыярытэтных кірунках сацыяльна-эканамічнага развіцця рэгіёну.

- У 2020 годзе чакаецца павелічэнне паступленняў у бюджэт на 11,2 працэнта. Больш за 74 працэнтаў у расходнай частцы бюджэту прадугледжана на фінансаванне сацыяльнай сферы, - распавяла рэктар ГрДУ імя Янкі Купалы, старшыня пастаяннай камісіі па сацыяльнай палітыцы і справах моладзі Гродзенскага абласнога Савета дэпутатаў Ірына Кітурка. - Калі ў працэнтных суадносінах гэтая сума застаецца на ўзроўні 2019 года, то ў грашовым выразе, у сувязі з павелічэннем бюджэту, атрымліваецца, што выдаткі на развіццё сацыяльнай сферы павялічваюцца больш чым на 200 мільёнаў рублёў.

Усе асноўныя артыкулы бюджэту на будучы год, якія прадугледжваюць развіццё адукацыі, культуры, аховы здароўя, сацыяльнай палітыкі, а таксама падтрымку важных грамадскіх мерапрыемстваў, запланаваны ў поўным аб'ёме. Так, праект бюджэту прадугледжвае рост расходаў на ахову здароўя больш чым на 20 мільёнаў рублёў. Вырастуць выдаткі таксама на фізічную культуру, спорт, на ўтрыманне ўстаноў культуры і адукацыі і на фінансаванне сацыяльна-значных мерапрыемстваў. Пры гэтым асноўны ўпор у праекце галоўнага фінансавага дакумента рэгіёна зроблены на рацыянальнае расходаванне бюджэтных сродкаў.

- Бюджэтам вобласці на 2020 год прадугледжана, перш за ўсё, узвядзенне такіх важных аб'ектаў сферы аховы здароўя, як анкадыспансер ў Гродне і клінічная бальніца ў Астраўцы. Закладзены выдаткі і на закупку сучаснага медыцынскага абсталявання, - адзначыла старшыня пастаяннай камісіі па сацыяльнай палітыцы і справах моладзі Гродзенскага абласнога Савета дэпутатаў Ірына Кітурка. - Што датычыцца сферы адукацыі, то прадугледжана будаўніцтва дзіцячага садка ў Скідалі і школы ў мікрараёне Грандзічы абласнога цэнтра. Яшчэ адно важнае пытанне - гэта забеспячэнне заработнай платы бюджэтнікам ў сувязі з пераходам на новыя ўмовы аплаты працы з 1 студзеня 2020 года. Неабходна забяспечыць суадносіны заработнай платы ў бюджэтнай сферы да зарплаты па эканоміцы ў цэлым не ніжэй за 80 працэнтаў. У бюджэце вобласці на рашэнне гэтай задачы таксама прадугледжана фінансаванне.

Акрамя таго, прадугледжана далейшае фінансаванне са сродкаў абласнога бюджэту работ па рэканструкцыі Старога замка ў Гродне і замка ў Наваградку. Будуць выдзелены сродкі на правядзенне такіх важных мерапрыемстваў, як святкаванне 75-годдзя Вялікай Перамогі і арганізацыя XIII Фестывалю нацыянальных культур у Гродне.