Канферэнцыя «Матэматычнае мадэляванне і дыферэнцыяльныя ўраўнанні» з'яўляецца спецыялізаваным навуковым форумам, які рэгулярна збірае ў Беларусі вядучых навукоўцаў з усяго свету. IV Міжнародная навуковая канферэнцыя прысвечана 95-годдзю член-карэспандэнта АН БССР Яўгена Аляксеевіча Іванова - выдатнага матэматыка, заснавальніка беларускай навуковай школы па тэорыі дыфракцыі электрамагнітных хваль і першага дэкана факультэта прыкладной матэматыкі БДУ. Яўген Іваноў вялікую ўвагу надаваў развіццю прыкладных матэматычных даследаванняў і прафесійнай падрыхтоўцы спецыялістаў па прыкладной матэматыцы. Яго працы, а таксама работы яго вучняў у дадзенай вобласці вядомыя ва ўсім свеце.

Асноўныя задачы форуму - абмен інфармацыяй аб найноўшых дасягненнях у галіне матэматычнага мадэлявання і дыферэнцыяльных ўраўнанняў, а таксама больш актыўнае ўцягванне вышэйшых навучальных устаноў у навукова-даследчы працэс у галіне тэарэтычнай і прыкладной матэматыкі. Спецыялізаваная матэматычная канферэнцыя, якая праходзіць пад эгідай Інстытута матэматыкі Нацыянальнай акадэміі навук Беларусі, закліканая паспрыяць папулярызацыі дасягненняў беларускай навукі як унутры рэспублікі, так і за яе межамі.