Дабрачыннае святочнае мерапрыемства адбудзецца 19 снежня.

У тэатралізаваным паказе прымуць удзел больш за 60 студэнтаў 1-5 курсаў філалагічнага факультэта спецыяльнасцей "Рамана-германская філалогія" (англійская, нямецкая), "Сучасныя замежныя мовы", "Беларуская філалогія". У гэтым годзе на сцэну ў якасці акцёраў таксама выйдуць курсанты ваеннага факультэта і дзеці супрацоўнікаў Купалаўскага ўніверсітэта.

Аўтарамі сцэнарыя выступіла ініцыятыўная студэнцкая група ў складзе Аліны Чарняўскай, Антона Гракова, Яўгеніі Рэуцкай, Марыі Пакала, Дзіяны і Крысціны Калеснік, Лізаветы Латвіс, Марыі Івановай. Кіраўнікамі акцыі з'яўляюцца старшыя выкладчыкі кафедры англійскай філалогіі Вольга Будзеніс і Вольга Ларына.

Усе сабраныя сродкі будуць накіраваныя ў Гродзенскі абласны цэнтр медыцынскай рэабілітацыі дзяцей-інвалідаў і хворых псіханеўралагічнага профілю. Дарэчы, падобныя акцыі ўжо сталі традыцыйнымі на факультэце і праходзяць з 2013 года.

Мерапрыемства адбудзецца ў актавай зале ўніверсітэта па адрасе: вул. Леніна, 32. Пачатак у 17.30.

Як распавялі арганізатары, у гэты дзень купалаўцы таксама арганізоўваюць дабрачынны кірмаш вырабаў ручной работы і прысмакаў, які пройдзе з 12.30 да 14.00 у фае галоўнага корпуса.