Са сваімі ідэямі ў гэты дзень перад журы і гледачамі выступілі 11 фіналістаў, якія паспяхова прайшлі ўсе этапы конкурсу. Акрамя таго, арганізатары далі магчымасць тром камандам, чый праект не прайшоў у фінал, заявіць пра сябе. Праўда, не за тры хвіліны - рэгламент для фіналістаў - а за адну.

Распрацоўвалі свае ідэі, рыхтаваліся да прэзентацыі і раіліся з экспертамі купалаўцы на працягу некалькіх месяцаў. У гэтым рабят падтрымлівала дзейнасць Студыі стартапаў і праектаў ГрДУ імя Янкі Купалы.

Усе праекты, якія заяўлены на конкурс, значныя для Гродзенскага рэгіёну - у гэтым упэўнены дырэктар Гродзенскай абласной установы фінансавай падтрымкі прадпрымальнікаў Алег Шыраеў.

- Ідэі студэнтаў закранаюць не толькі тэхналагічныя распрацоўкі, але і культуру нашай вобласці і народа ў цэлым. Першы этап адкрыў для нас вельмі цікавыя праекты. Сумесна з экспертамі і ўніверсітэтам мы прыкладзем максімум намаганняў, каб іх рэалізаваць.

Ацэньвалі ідэю, прэзентацыю, уменне адказваць на пытанні і абараняць свой праект прадстаўнікі гродзенскай бізнес-супольнасці, а таксама выкладчыкі ГрДУ імя Янкі Купалы.

Прарэктар па навуковай працы ГрДУ імя Янкі Купалы Юрый Раманоўскі распавёў, што конкурс становіцца папулярным сярод студэнтаў: у першым конкурсе «ИнНаСтарт» прымала ўдзел каля 40 праектаў, у гэтым годзе - ужо больш за 50.

– Мы залучаем студэнтаў у фарміраванне бізнес-ідэй і атрыманне новых бізнес-кампетэнцый, якія спатрэбяцца будучым спецыялістам у сваёй прафесійнай дзейнасці. Важна, што большасць праектаў - міждысцыплінарныя, у распрацоўцы якіх удзельнічаюць студэнты розных факультэтаў. Напрыклад, у камандзе разам з айцішнікаў можа быць і дызайнер, і эканаміст, і юрыст, - падкрэсліў Юрый Раманоўскі.

У рамках фіналу былі прэзентаваныя інавацыйныя тэхнічныя распрацоўкі, камерцыйныя паслугі і сацыяльныя прапановы. Напрыклад, беспілотны лятаючы апарат на іённай цязе «Ion_Plane», які адрозніваецца ад звыклага робата тым, што ён практычна бязгучны і працуе без механізму для руху і кіравання. Актуальнай для турыстычнага сезону і развіцця бязвізавай зоны стала ідэя перасоўнай кавярні «CoffeBikе», падчас руху якой наведвальнікі не толькі могуць атрымліваць асалоду ад напояў, але і даведвацца пра славутасці горада. Экалагічныя праблемы не пакінулі абыякавымі стваральніц экалагічнай студыі для дзяцей, якая, дарэчы, ужо функцыянуе. Дзяўчыны праводзяць заняткі на базе школы і распавядаюць дзецям пра захаванне навакольнага асяроддзя і экалогіі.

Па традыцыі пераможцы III Адкрытага конкурсу студэнцкіх стартап-праектаў «ИнНаСтарт» былі названыя ў некалькіх катэгорыях. Так, першае месца ў катэгорыі «Лепшы стартап-праект - ПАСЛУГІ» заняла кавярня «CoffeBikе», на другім месцы распрацоўка юрыдычнай клінікі ГрДУ імя Янкі Купалы «Праектны юрыст малога бізнэсу», на трэцім - прыкладанне для аказання псіхалагічнай падтрымкі «PsyLegend». Дыплом першай ступені ў катэгорыі «Лепшы стартап-праект - ПРАДУКТ» заваяваў праект «Ion_Plane», на другім месцы распрацоўка кампазіцыйнага матэрыялу на аснове серазмяшчальных адходаў ААТ «Гродна Азот», трэцім стала школа 3D-аўтамадэлявання «Аўтамайстар». Праект «Рэінкарнацыя» стаў трэцім у катэгорыі «Лепшы стартап-праект - САЦЫЯЛЬНЫЯ ІНАВАЦЫІ», дыплом другой ступені ў праекта «Гісторыка-культурны комплекс «Спадчына»», на першым месцы ідэя праецыравання карцін беларускіх мастакоў на сцены горада «Праекцыя». Дыпломам глядацкіх сімпатый адзначана Экалагічная студыя для дзяцей малодшага школьнага ўзросту.