У сустрэчы прынялі ўдзел прарэктары і дэканы факультэтаў дзвюх вышэйшых навучальных устаноў, а таксама загадчыкі кафедраў купалаўскай ВНУ. У якасці мадэратараў выступілі доктар педагагічных навук, прафесар, рэктар Беларускага дзяржаўнага педагагічнага ўніверсітэта імя Максіма Танка Аляксандр Іванавіч Жук і доктар педагагічных навук, дацэнт, рэктар Гродзенскага дзяржаўнага ўніверсітэта імя Янкі Купалы Андрэй Дзмітрыевіч Кароль.

У прывітальным слове да ўдзельнікаў семінара Андрэй Дзмітрыевіч адзначыў: «Сёння мы сабраліся, каб абмеркаваць два істотныя пытанні. Па-першае, пытанне супрацоўніцтва вядучага педагагічнага ВНУ краіны Беларускага дзяржаўнага педагагічнага ўніверсітэта імя Максіма Танка і вядучага класічнага рэгіянальнага - Гродзенскага дзяржаўнага ўніверсітэта імя Янкі Купалы. Па-другое, важна разгледзець актуальныя аспекты падрыхтоўкі педагога ў сучасных умовах, а таксама ўзаемадзеянне рэспубліканскай сістэмы педагагічнай адукацыі з рэгіянальнай».

Перад аўдыторыяй выступіў рэктар БДПУ імя Максіма Танка Аляксандр Іванавіч Жук. Ён падзякаваў купалаўскай ВНУ за зацікаўленасць і водгук у правядзенні сустрэчы і прадставіў праблемнае поле семінара. У прыватнасці, Аляксандр Іванавіч звярнуўся да пытання сеткавага ўзаемадзеяння ў рамках прыярытэтных псіхолага-педагагічных даследаванняў у галіне адукацыі: распавёў пра важнасць развіцця ў сучасных умовах новых напрамкаў сумесных даследаванняў у сферы педагогікі, пра неабходнасць правядзення іх у рамках праграм навукова-даследчай працы рознага ўзроўню. Акрамя таго, рэктар педагагічнага ўніверсітэта акцэнтаваў увагу на сеткавым узаемадзеянні па павышэнню якасці адукацыйнага працэсу, адзначыўшы вострую неабходнасць абнаўлення зместу педагагічнай адукацыі, распрацоўкі прафесійнага стандарту педагога, узгаднення адукацыйнага і прафесійнага стандартаў, узмацнення практыка-арыентаванага складніка і арыентацыі на кампетэнтнасны падыход.

З канструктыўнымі прапановамі выступілі ўдзельнікі семінара.

Так, прарэктар па вучэбнай рабоце нашага ўніверсітэта Юрый Эдуардавіч Бялых падкрэсліў, што ў рамках рэалізацыі канцэпцыі бесперапыннай педагагічнайадукацыі ВНУ неабходна зрабіць акцэнт на якасным складніку падрыхтоўкі будучых педагогаў, дзякуючы чаму стануць магчымыя і падрыхтоўка іх як высакакласных спецыялістаў, і павышэнне прэстыжу педагагічнай прафесіі. Юрый Эдуардавіч таксама адзначыў неабходнасць павышэння якасці педагагічнай адукацыі на аснове пашырэння акадэмічнай аўтаномнасці ўніверсітэтаў і акадэмічнай мабільнасці прафесарска-выкладчыцкага складу.

Прапановы па эфектыўнаму сеткаваму ўзаемадзеянню і сацыяльнаму партнёрству між дзвюма ВНУ прагучалі ад прадстаўнікоў ГрДУ імя Янкі Купалы - дырэктара інстытута павышэння кваліфікацыі і перападрыхтоўкі кадраў Тамары Андрэеўны Бабкінай, дэкана педагагічнага факультэта Святланы Якаўлеўны Кострыцы, загадчыка кафедры педагогікі і сацыяльнай работы Віктара Пятровіча Таранцея і загадчыка кафедры фізічнага выхавання і спорту Вячаслава Аляксандравіча Максімовіча. Выступоўцы прапанавалі механізмы ўзаемадзеяння між ВНУ ў вучэбна-метадычнай сферы, у прыватнасці, сумесную распрацоўку вучэбных планаў і праграм; у сферы навуковых даследаванняў - правядзенне сумесных канферэнцый, семінараў, сустрэч, арганізацыю сумесных камісій па абароне навуковых прац і сумесных курсаў павышэння кваліфікацыі з выкарыстаннем сучасных IT-тэхналогій.

У канцы сустрэчы рэктары падпісалі дамову аб супрацоўніцтве паміж Гродзенскім дзяржаўным універсітэтам імя Янкі Купалы і Беларускім дзяржаўным педагагічным універсітэтам імя Максіма Танка з мэтай павышэння якасці падрыхтоўкі, перападрыхтоўкі і павышэння кваліфікацыі спецыялістаў адукацыі на аснове сацыяльнага партнёрства, дасягненняў псіхолага-педагагічнай навукі і інавацыйнай адукацыйнай практыкі.

Бакі дамовіліся аб супрацоўніцтве па 15 напрамках і стварэнні рабочых груп для правядзенні навуковых даследаванняў, сумесных навуковых мерапрыемстваў з прыцягненнем навуковых, практычных, навукова-даследчых арганізацый, а таксама асобных навукоўцаў, спецыялістаў і практыкаў для рэалізацыі агульных навуковых праграм і праектаў.