Сярод ганаровых гасцей на мерапрыемстве прысутнічалі рэктар ГрДУ імя Янкі Купалы Ірына Кітурка, старшыня Гродзенскай абласной арганізацыі Беларускага прафсаюза работнікаў адукацыі і навукі Вера Грышэчка, ветэран працы ўніверсітэта, былы старшыня першаснай прафсаюзнай арганізацыі работнікаў ГрДУ імя Янкі Купалы Уладзімір Хілюта, а таксама дэлегаты ад прафсаюзных арганізацый структурных падраздзяленняў.

У прывітальным слове Ірына Кітурка адзначыла, што галоўны прынцып дзейнасці як прадстаўнікоў адміністрацыі ўніверсітэта, так і прафсаюзнага камітэта - гэта прынцып сацыяльнага партнёрства, а асноўны патэнцыял у любым калектыве - гэта людзі, здольныя на сваім месцы дасягаць высокіх вынікаў.

Старшыня першаснай прафсаюзнай арганізацыі работнікаў ГрДУ імя Янкі Купалы Ігар Кергет у сваім дакладзе прааналізаваў вынікі працы за перыяд з лістапада 2014 года па лістапад 2019 года, пазначыў станоўчыя вынікі і праблемныя пытанні, а таксама вызначыў асноўныя напрамкі на наступныя пяць гадоў. Ігар Кергет распавёў пра тое, што рэгулярна на пасяджэннях прэзідыума першаснай прафсаюзнай арганізацыі работнікаў ГрДУ вывучаюцца пытанні калектыўна-дагаворнага рэгулявання, сацыяльнага партнёрства, выканання працоўнага заканадаўства, а таксама заканадаўства аб ахове працы. Ён адзначыў, што за апошнія пяць гадоў ва ўніверсітэце павялічылася колькасць працоўных кантрактаў, заключаных з работнікамі на максімальны тэрмін, а маніторынг за выкананнем працоўнага заканадаўства паказвае, што за справаздачны перыяд значна паменшылася колькасць парушэнняў у структурных падраздзяленнях.

Як прагучала падчас канферэнцыі, адным з істотных дасягненняў прафсаюзнага камітэта ў справаздачным перыядзе стала распрацоўка і ўкараненне сістэмы добраахвотнага страхавання медыцынскіх выдаткаў. Калі у 2018 годзе на момант заключэння поліса было ўсяго 32 жадаючых скарыстацца ўсімі паслугамі медыкаў горада ў рамках добраахвотнага медыцынскага страхавання, то цяпер гэтая лічба павялічылася да 198 чалавек.

Пра тое, як расходаваліся прафсаюзныя сродкі, у тым ліку на аказанне матэрыяльнай дапамогі сябрам прафсаюза, на аздараўленне работнікаў і іх дзяцей, культурна-масавую і спартыўную работу, экскурсіі распавялі прадстаўнікі рэвізійнай камісіі.

Удзел у канферэнцыі прынялі 152 дэлегаты. Пасля разгляду асноўнай павесткі дня прысутныя прагаласавалі за прапанаваныя кандыдатуры на пасады старшыні і намесніка старшыні першаснай прафсаюзнай арганізацыі работнікаў ГрДУ імя Янкі Купалы, а таксама старшыні рэвізійнай камісіі. На пасадзе кіраўніка першаснай прафсаюзнай арганізацыі работнікаў універсітэта працягне працаваць Ігар Кергет. Напрыканцы канферэнцыі былі абраныя дэлегаты на XXVI справаздачна-выбарчую канферэнцыю Гродзенскай абласной арганізацыі Беларускага прафесійнага саюза работнікаў адукацыі і навукі.

Падводзячы вынікі, рэктар ГрДУ імя Янкі Купалы Ірына Кітурка падкрэсліла, што сёння больш за 99 працэнтаў ад агульнай колькасці супрацоўнікаў універсітэта - гэта члены прафсаюза, а значыць, Купалаўскі ўніверсітэт - гэта вялікі калектыў прафсаюзных работнікаў. А таму і адміністрацыя ўніверсітэта, і прафсаюзны камітэт павінны працаваць сумесна, і гэта будзе толькі спрыяць эфектыўнаму і хуткаму вырашэнню ўсіх актуальных пытанняў і праблемных момантаў, якія ўзнікаюць у дзейнасці ўніверсітэта.

У рамках мерапрыемства старшыні першаснай прафсаюзнай арганізацыі работнікаў ГрДУ імя Янкі Купалы Ігару Кергету быў ўручаны юбілейны медаль «115 гадоў прафсаюзнаму руху Беларусі». Ганаровай граматай Цэнтральнага камітэта Беларускага прафсаюза работнікаў адукацыі і навукі ўзнагародзілі начальніка Цэнтра кадравай і прававой работы ГрДУ імя Янкі Купалы Галіну Сакомскую. Ганаровыя граматы Гродзенскай абласной арганізацыі Беларускага прафсаюза работнікаў адукацыі і навукі атрымалі дацэнт кафедры машыназнаўства і тэхнічнай эксплуатацыі аўтамабіляў Аляксандр Піваварчык і вядучы інжынер аддзела эксплуатацыі будынкаў і збудаванняў адміністрацыйна-гаспадарчага кіравання Алена Буйніцкая.

Ганаровымі граматамі прафсаюзнай арганізацыі ўніверсітэта ўзнагароджаны загадчык сектара перыядычных, даведачных выданняў і дысертацыйнага фонду навуковай бібліятэкі Святлана Токарава, намеснік начальніка Цэнтра грамадскага харчавання Наталля Макарава, старшы выкладчык кафедры ўзроставай і педагагічнай псіхалогіі Наталля Ларыёнава, загадчык вучэбна-метадычнага кабінета лінгвістычных камп'ютэрных тэхналогій Алена Сняжко, загадчык вучэбна-метадычнага кабінета факультэта гісторыі, камунікацыі і турызму Вікторыя Купа, выхавальнік сектара ідэалагічнай і выхаваўчай працы студэнцкага гарадка Вераніка Грыбок, вядучы інжынер-праграміст інфармацыйна-аналітычнага цэнтра Святлана Кісель, вядучы спецыяліст дэканата факультэта мастацтваў і дызайну Марыя Блажэй.