Удзел у прэстыжных спаборніцтвах прынялі шэсць прадстаўнікоў ГрДУ імя Янкі Купалы: студэнты факультэта эканомікі і кіравання Віктар Адынец, Уладзілен Лакцевіч і Дзяніс Пятрашын, а таксама студэнты факультэта матэматыкі і інфарматыкі Мікалай Ігнаценка, Арсеній Коласаў і Юрый Сарасек. У складзе дзвюх каманд, якія прадстаўлялі наш універсітэт, яны павінны былі вырашыць максімальную колькасць з прапанаваных задач на працягу 5 гадзін.

Усяго за права выйсці ў фінал змагаліся 57 каманд з 17 універсітэтаў Беларусі, Латвіі, Літвы і Калінінградскай вобласці Расіі. Каманды ГрДУ імя Янкі Купалы вярнуліся з спаборніцтваў з дыпломамі 3-й ступені. Як адзначыў трэнер каманд Юрый Сцёпін, гэта першы выпадак за апошнія 15 гадоў, калі дыпломамі па выніках чвэрцьфіналу былі ўзнагароджаны адразу дзве каманды ГрДУ імя Янкі Купалы. 17 лепшых каманд, у тым ліку і адна з каманд Купалаўскага ўніверсітэта, атрымалі права на ўдзел у паўфінале чэмпіянату свету па праграмаванні, які адбудзецца 1 снежня ў Санкт-Пецярбургу.

- Для нас вельмі важны наступны этап, паўфінал, - распавёў старшы выкладчык кафедры матэматычнага і інфармацыйнага забеспячэння эканамічных сістэм, трэнер каманд Юрый Сцёпін. - У мінулым годзе мы атрымалі па выніках паўфіналу дыплом 3-й ступені. У гэтым годзе спадзяемся выступіць не горш. З рэгіянальных ВНУ Беларусі пакуль нікому не ўдавалася выйсці ў фінал, але мы аднойчы былі ўсяго ў адным кроку ад гэтага.

Купалаўцы пастаянна ўдзельнічаюць у чвэрцьфіналах. На працягу апошніх больш чым 10 гадоў нашы студэнцкія каманды рэгулярна выходзяць у паўфінал чэмпіянату свету па праграмаванні, атрымліваюць дыпломы 2 і 3 ступені. Некалькі разоў Гродзенскі дзяржаўны ўніверсітэт імя Янкі Купалы станавіўся пляцоўкай для правядзення міжнародных вучэбна-трэніровачных збораў Moscow Workshops ICPC па падрыхтоўцы да чэмпіянату свету па спартовым праграмаванні ICPC. Зборы арганізоўваліся сумесна з Цэнтрам развіцця IT-адукацыі Маскоўскага фізіка-тэхнічнага інстытута.